சூர்யா ரசிகர்களுக்கு ஒரு செம நியூஸ்.. சூரரைப் போற்று படத்துக்கு என்ன சான்றிதழ் தெரியுமா?

விமான கம்பெனி ஓனர்

ஊர்க்குருவி பருந்தாகுமா என்ற பழமொழியை ஊர்க்குருவியாலும் பருந்தாக முடியும் என நிகழ்த்திக் காட்டுவதே சூரரைப் போற்று படத்தின் கதை. ஒரு சாதாரண மாறா எப்படி விமான கம்பெனி நிறுவனத்துக்கு ஓனராக மாறுகிறார் என்பதை திரைப்படமாக உருவாக்கி உள்ளார் இறுதிச்சுற்று படத்தை இயக்கிய சுதா கொங்கரா.

மிரட்டல் டீசர்

இந்த ஆண்டு ஜனவரி 7ம் தேதியே சூர்யாவின் சூரரைப் போற்று படத்தின் டீசர் வெளியாகி மிரட்டியது. வாரணம் ஆயிரம் படத்தை போல பலவிதமான பரிமாணங்களில் தன்னை செதுக்கி நடிகர் சூர்யா நடித்திருந்த மேக்கிங் வீடியோவும், டீசரும் சூர்யாவின் ரசிகர்களை மட்டுமின்றி ஒட்டுமொத்த தமிழ் சினிமா ரசிகர்களையும் வியக்க வைத்தது.

நடுவானில்

அதை தொடர்ந்து இந்த படத்தின் இசை வெளியீட்டு விழாவில் விமான நிலையத்தில் பிரம்மாண்டமாக சூர்யா நடத்தியிருந்தார். விமானத்தில் பயணிக்காத 70 மாணவர்கள் உள்பட 100 பேரை தன் சொந்த செலவில் பறக்க வைத்து நடுவானில் "வெய்யோன் சில்லி" பாடல் வீடியோவையும் ரிலீஸ் செய்து இந்திய சினிமாவையே திரும்பி பார்க்க வைத்தார்.

யு சான்றிதழ்

கோடை விடுமுறைக்கு சூர்யாவின் சூரரைப் போற்று படம் வெளியாகும் என அறிவிக்கப்பட்டு இருந்தது. ஆனால், கொரோனா வைரஸ் பரவல் காரணமாக நாடு முழுவதும் போடப்பட்டுள்ள லாக்டவுன் காரணமாக புதுப் படங்கள் ஏதும் ரிலீஸ் ஆக முடியாமல் இருந்தது. இந்நிலையில், தற்போது சூரரைப் போற்று படத்திற்கு ‘யு' சான்றிதழ் கிடைத்துள்ளதாக இசையமைப்பாளர் ஜி.வி. பிரகாஷ் டிவீட் போட்டுள்ளார்.

எப்போ ரிலீஸ்

ஜோதிகாவின் பொன்மகள் வந்தாள் படத்தை போலவே சூரரைப் போற்று படமும் OTT தளத்தில் நேரடியாக வெளியாகுமா? என்ற கேள்விக்கு இல்லை, இந்த படம் தியேட்டர் ரிலீசுக்கு பின்னரே ஆன்லைனில் வெளியாகும் என சூர்யா சமீபத்தில் கூறியிருந்தார். தற்போது ‘யு' சான்றிதழ் குறித்து ஜி.வி. பிரகாஷ் அறிவிக்க அவரிடம் ரசிகர்கள் அப்டேட் கேட்டனர். அதற்கு சீக்கிரமே வரும் என பதில் அளித்துள்ளார்.