கண்டுக்காத ரஜினி.. ராஜமெளலிக்கு க்ரீன் சிக்னல் கொடுத்த கமல்.. திடீர் சந்திப்பு வேற நடந்திருக்காம்!

ரஜினியை இயக்க ஆசைப்பட்ட ராஜமெளலி

நான் ஈ, மகதீரா, பாகுபலி, ஆர்ஆர்ஆர் படங்களை இயக்கி உலகளவில் பல ஹாலிவுட் இயக்குநர்களையே மிரள வைத்துள்ள இயக்குநர் ராஜமெளலி தான் ரஜினியை வைத்து படம் இயக்கினால் முதல் சீனில் இருந்து கடைசி சீன் வரை விசில் சத்தம் விண்ணை பிளக்கும் என தொடர்ந்து தனது பேட்டிகளில் கூறி வருகிறார் ராஜமெளலி.

கண்டுக்காத ரஜினி

இயக்குநர் ஷங்கரின் எந்திரன், 2.0 படங்களிலேயே படாத பாடு பட்ட நடிகர் ரஜினிகாந்த் இனிமேல் பிரம்மாண்ட இயக்குநர்கள் படங்களில் கமிட் ஆக வேண்டாம் என்கிற முடிவுக்கு வந்து தான் பா. ரஞ்சித், கார்த்திக் சுப்புராஜ், நெல்சன் என இளம் இயக்குநர்கள் படத்தில் நடித்து வருகிறார். ராஜமெளலிக்கு வாய்ப்பே அவர் வழங்கவில்லை.

கமல் க்ரீன் சிக்னல்

மகேஷ் பாபுவின் படத்தில் முக்கிய கதாபாத்திரத்தில் கமல்ஹாசனை நடிக்க வைத்து விடலாம் என இயக்குநர் ராஜமெளலி கேட்ட போது கமல் யோசித்த நிலையில், தற்போது புதிய படம் ஒன்றையே கமல்ஹாசனை வைத்து இயக்குநர் ராஜமெளலி இயக்கப் போவதாக தகவல்கள் வெளியாகி உள்ளன. மகேஷ் பாபுவின் படத்தை முடித்து விட்டு இந்த படத்தை ராஜமெளலி இயக்குவார் என்றும் தெலுங்கு திரையுலகில் பரபரப்பான பேச்சுக்கள் அடிபட்டு வருகின்றன. கடந்த வாரம் இதுதொடர்பாக ராஜமெளலி மற்றும் கமல் இடையே ஒரு ரகசிய சந்திப்பும் நடைபெற்றுள்ளதாக தகவல்கள் கசிந்துள்ளன.

பிரம்மாண்ட இயக்குநர்கள்

ஷங்கர் இயக்கத்தில் இந்தியன் 2 படத்தில் நடித்து வரும் கமல்ஹாசன், அடுத்ததாக பொன்னியின் செல்வன் படத்தை இயக்கிய மணிரத்னம் இயக்கத்தில் நடிக்கப் போவதாகவும் அந்த படத்தை முடித்து விட்டு ராஜமெளலி படத்தில் நடிக்கப் போவதாகவும் தகவல்கள் வெளியாகி உள்ளன. மேலும், லோகேஷ் கனகராஜ் உடன் விக்ரம் 3 படமும் லைன் அப்பில் இருக்கிறது.

பிக் பாஸுக்கு முழுக்கு

அடுத்தடுத்து பெரிய படங்களில் நடிக்க உள்ள நிலையில், இந்த சீசனுடன் பிக் பாஸ் நிகழ்ச்சியில் இருந்து நிரந்தரமாக விலகிக் கொள்ளவும் கமல்ஹாசன் முடிவு செய்துள்ளார் என்றும் தகவல்கள் வெளியாகி வருகின்றன. ஜனவரி மாதத்துடன் பிக் பாஸ் நிகழ்ச்சி நிறைவடைய உள்ள நிலையில், பிக் பாஸ் அல்டிமேட் சீசன் 2 முதல் புதிய ஹோஸ்ட் நிகழ்ச்சியை தொகுத்து வழங்குவார் என எதிர்பார்க்கப்படுகிறது.