மோகன் பாபு பிறந்த நாள் விழாவில் சூர்யாவின் சர்ப்ரைஸ் விசிட்!

ஹைதராபாத்: தெலுங்கு நடிகரும் முன்னாள் எம்பியுமான மோகன் பாபு பிறந்த நாள் விழா கொண்டாட்டத்தில் திடீரென கலந்து கொண்டு, மோகன் பாபுவை வாழ்த்தினார் நடிகர் சூர்யா.

சூர்யா தற்போது அஞ்சான் படத்தில் நடித்து வருகிறார். லிங்குசாமி இயக்கும் இந்தப் படத்தின் ஷூட்டிங் மும்பையில் நடக்கிறது.

இதன் முதல் கட்ட படப்பிடிப்பு வருகிற 2-ந்தேதி முடியும் என்றும் அடுத்த கட்ட படப்பிடிப்பு ஏப்ரல் இரண்டாவது வாரத்தில் தொடங்கும் என்றும் கூறப்படுகிறது.

இந்த நிலையில், படப்பிடிப்பில் கிடைத்த இடைவெளியில் ஹைதராபாத்தில் உள்ள நடிகர் மோகன்பாபு வீட்டுக்கு திடீரென்று சென்றார் சூர்யா.

அப்போது மோகன்பாபு தனது 62-வது பிறந்த நாளை கொண்டாடிக் கொண்டு இருந்தார். அவருக்கு சூர்யா பிறந்த நாள் வாழ்த்துக் கூறினார்.

சூர்யாவின் இந்த திடீர் வருகை அங்கு இருந்தவர்களுக்கு இன்ப அதிர்ச்சியைத் தந்தது.

சூர்யாவை மோகன்பாபு கட்டிப்பிடித்து வரவேற்றார். மோகன்பாபுவின் மகனும் நடிகருமான மனோஜ் மஞ்சு, மகளும் நடிகையுமான லட்சுமிமஞ்சு மற்றும் குடும்பத்தினர் சூர்யாவை வரவேற்று தங்கள் மகிழ்ச்சியைத் தெரிவித்தனர்.

ஒரு சிறந்த மனிதருக்கு வாழ்த்துச் சொல்ல வந்ததில் மிகுந்த மகிழ்ச்சியடைந்ததாக சூர்யா தெரிவித்தார்.