'குழந்தைசாமி'யை கிண்டலடிக்கும் 'தி இன்டர்வியூ'... ஆன்லைன் ரிலீஸ் மூலமாக 15 மில்லியன் டாலர் வசூல்!

தி இன்டர்வியூ திரைப்படம் ஆன்லைனில் வெளியாகி, 15 மில்லியன் டாலர்களை ஈட்டியுள்ளது.

இதன் மூலம் சோனி பிக்சர்ஸ் நிறுவனத்தில் மிகப் பெரிய வசூல் குவித்த படம் என்ற பெருமையைப் பெற்றுள்ளது.

வட கொரிய அதிபரை கிண்டலடித்து எடுக்கப்பட்ட படம் தி இன்டர்வியூ. இந்தப் படத்தை திரையரங்குகளில் வெளியிட அமெரிக்காவின் முன்னணி திரையரங்குகள் தயக்கம் காட்டின.

இதனால் படத்தின் பிரிமியர் காட்சிகளை ரத்து செய்த சோனி நிறுவனம், படத்தை ஆன்லைனில் வெளியிடப் போவதாக அறிவித்து, அதை செயல்படுத்தவும் செய்தது. கடந்த வெள்ளியன்று ஆன்லைனில் வெளியான தி இன்டர்வியூ.

27-ம் தேதி சனிக்கிழமை மட்டுமே இந்தப் படத்தை 2 மில்லியன் முறை ஆன்லைனில் வாங்கிப் பார்த்துள்ளனர் பார்வையாளர்கள்.

ஆன்லைனில் வெளியிட்ட பிறகு படத்தை நூற்றுக்கும் மேற்பட்ட திரையரங்குகளும் திரையிட்டன.

இதன் மூலம் இந்தப் படத்துக்கு 15 மில்லியன் டாலர் வருவாய் கிடைத்துள்ளது. ஆன்லைனில் அதிக வருமானம் ஈட்டிய படம் என்ற பெருமையும் தி இன்டர்வியூவுக்கு கிடைத்துள்ளது.

தியேட்டர்களிலும் படத்தைக் காண நல்ல கூட்டம் வருவதால், ஹேக்கர்களால் பெரும் பாதிப்புக்குள்ளான சோனி நிறுவனம் ஆறுதலடைந்துள்ளது.