டிடிஎச்சில் வெளியாகும் படங்களுக்கு ஒத்துழைப்பில்லை! - தியேட்டர்காரர்கள், விநியோகஸ்தர்கள் அறிவிப்பு

டிடிஎச்சில் வெளியாகும் விஸ்வரூபம் உள்ளிட்ட எந்தப் படத்துக்கும் திரையரங்குகள், விநியோகஸ்தர்கள் தரப்பில் இனி ஒத்துழைப்பில்லை என்று அறிவிக்கப்பட்டுள்ளது.

தமிழ்நாடு தியேட்டர் உரிமையாளர்கள் மற்றும் விநியோகஸ்தர்கள் கூட்டாக இதனை அறிவித்துள்ளனர்.

இந்த இருதரப்பினரின் கூட்டுக் கூட்டம் நேற்று சென்னையில் நடந்தது. கூட்டத்தின் முடிவில், "தியேட்டரில் வெளியாகும் முன்பே டிடிஎச் அல்லது வேறு எந்தத் தொழில்நுட்பத்தில் படங்கள் வெளியானாலும் அதனை வாங்குவதில்லை. விஸ்வரூபம் மட்டுமல்ல, இந்த முறையில் வெளியாகும் அனைத்துப் படங்களுக்கும் இதேதான் முடிவு.

இந்த முடிவுக்கு ஒருமனதாக ஆதரவளித்துவரும் அபிராமி ராமநாதன், விநியோகஸ்தர்கள் கூட்டமைப்பு மற்றும் ஊடகங்களுக்கு நன்றி தெரிவித்துக் கொள்கிறேன்," என்று தீர்மானம் நிறைவேற்றப்பட்டுள்ளது.

இதற்கிடையே, கமல் பாணியில் மேலும் சில படங்களை பொங்கல் முதல் டிடிஎச்சில் ஒளிபரப்ப தயாரிப்பாளர்கள் சிலர் முடிவெடுத்துள்ளதாகத் தெரிகிறது.