தில்லு முல்லு விவகாரம்... டீல் முடிஞ்சி போச்சு... கேஸ் வாபஸ்!

ரஜினியின் மீசை தான் கதை

ரஜினி, மாதவி ஜோடியாக நடித்து 1981-ம் ஆண்டு ரிலீசாகி வெற்றிகரமாக ஓடிய படம் தில்லு முல்லு. கே.பாலச்சந்தர் இயக்கிய அந்தப் படத்தில் ரஜினி, முதல்தடவையாக மீசை இல்லாமல் நடித்தார். இந்த மீசையை வைத்துதான் முழு கதையே நகர்ந்தது.

சிவாவின் புதிய தில்லுமுல்லு

தற்போது சிவா, இஷா தல்வர், பிரகாஷ் ராஜ் நடிக்க அதே பெயரில் ரீமேக் ஆகிறது புதிய தில்லுமுல்லு. வேந்தர் மூவிஸ் தயாரிக்க, பத்ரி இயக்குகிறார். பிரம்மாண்டமான அறிவிப்போடு பூஜை போடப்பட்டது.

வழக்கு தொடர்ந்த ஒரிஜினல்

தில்லு முல்லு படத்தை ரீமேக் செய்வதை எதிர்த்து கலாகேந்திரா நிறுவன உரிமையாளர் விஜயலட்சுமி சென்னை 13-வது சிட்டி சிவில் கோர்ட்டில் வழக்கு தொடர்ந்தார். "தில்லு முல்லு படத்தின் உரிமை எங்களிடம் உள்ளது. எங்களிடம் அனுமதி பெறாமல் இப்படத்தை எடுப்பதற்கு தடை விதிக்க வேண்டும்" என்றும் மனுவில் கோரி இருந்தனர். இந்த வழக்கு விசாரணைக்கு எடுத்துக் கொள்ளப்பட்டது.

ரூ.24 லட்சம் சமரசம்

இந்த நிலையில் இருதரப்புக்கும் இடையே தற்போது சமரசம் ஏற்பட்டு உள்ளது. விஜயலட்சுமிக்கு ரூ.24 லட்சம் கொடுத்து தில்லு முல்லு படத்தின் ரீமேக் உரிமையை வேந்தர் மூவீஸ் வாங்கியுள்ளது. இதற்கான உடன்பாட்டில் இருவரும் கையெழுத்திட்டனர். இதையடுத்து வழக்கு முடித்து வைக்கப்பட்டுள்ளதாக வக்கீல் ஆனந்த் கூறினார்.

அடடா, படத்துக்கு பப்பிளிசிட்டி போச்சே!