”என்னடி முனியம்மா” புகழ் டி.கே.எஸ் நடராஜன் காலமானார்.. சோகத்தில் ரசிகர்கள்

டி.கே.எஸ். நடராஜன் காலமானார்

1954ம் ஆண்டு வெளியான ரத்தபாசம் படத்தின் மூலம் நடிகராக அறிமுகமானவர் டி.கே.எஸ். நடராஜன். ஏகப்பட்ட நாட்டுப்புற பாடல்களையும் பாடி பிரபலமானவர். வயது மூப்பு காரணமாக இன்று காலை 6.30 மணிக்கு டி.கே.எஸ். நடராஜன் இயற்கை எய்தினார். அவருக்கு வயது 87.

500 படங்கள்

ரத்த பாசம் படத்தில் அறிமுகமான டி.கே.எஸ். நடராஜன், எம்.ஜி.ஆர், சிவாஜி, ரஜினிகாந்த், கமல்ஹாசன் உள்ளிட்ட அனைத்து முன்னணி நடிகர்கள் படங்களிலும் நடித்து பிரபலமானவர். தமிழ் சினிமாவில் சுமார் 500க்கும் மேற்பட்ட படங்களில் குணசித்திர நடிகராக நடித்துள்ளார்.

என்னடி முனியம்மா

பிரபல இசையமைப்பாளர் சங்கர் கணேஷ் இசையில் வாங்க மாப்பிள்ளை வாங்க படத்தில் இடம்பெற்ற "என்னடி முனியம்மா" பாடலை பாடி ரசிகர்கள் மத்தியில் பிரபலமானவர் டி.கே.எஸ். நடராஜன். மேலும், 2006ம் ஆண்டு அர்ஜுன் நடித்த வாத்தியார் படத்தில் அந்த பாடல் ரீமேக் செய்யப்பட்ட நிலையில், டி.கே.எஸ். நடராஜனையும் அந்த பாடலில் ஆட வைத்திருந்தனர்.

ரசிகர்கள் இரங்கல்

பாடகராகவும் நடிகராகவும் தமிழ் சினிமாவில் பல ஆண்டுகள் பணியாற்றி வந்த டி.கே.எஸ். நடராஜன் வயது மூப்பு காரணமாக இன்று இயற்கை எய்திய நிலையில், ரசிகர்கள் மற்றும் சினிமா பிரபலங்கள் ஆழ்ந்த இரங்கல்களை தெரிவித்து வருகின்றனர்.