மீண்டும் தயாளன் இயக்கத்தில் வடிவேலு... நல்லவேளை மன்னராக இல்லை!!

வடிவேலு மீண்டும் ஒரு படத்தில் கதாநாயகனாக நடிக்கிறார். இந்தப் படத்தை அவரை வைத்து தெனாலிராமன் படம் இயக்கிய யுவராஜ் தயாளனே இயக்குகிறார்.

மூன்று ஆண்டுகள் திரையுலகிலிருந்து விலகியிருந்த வடிவேலு கடந்த நடித்து வெளியான படம் தெனாலிராமன்.

கலவையான விமர்சனங்களை அந்தப் படம் சந்தித்தாலும், பரவாயில்லை, வடிவேலுவுக்காக பார்க்கலாம் என பலரும் பார்த்த படம் அது.

அதற்குப் பிறகு வடிவேலு எந்தப் படத்தில் நடிக்கிறார் என்பதே தெரியாமல் இருந்தது. சிலர் அவர் மீண்டும் காமெடிக்குத் திரும்பிவிட்டார் என்றார்கள். சிலர், இல்லை மீண்டும் மன்னர் வேடம் போடப் போகிறார் என பீதி கிளப்பினார்கள்.

இந்த நிலையில், அவர் மீண்டும் கதாநாயகனாகவே நடிக்கப் போவதாகவும், ஆனால் இந்த முறை மன்னர் வேஷ உடைகளுக்கு ரெஸ்ட் என்றும் தகவல் வெளியாகியுள்ளது.

இந்தப் புதிய படத்தை இயக்கும் வாய்ப்பையும் அவர் தெனாலிராமன் யுவராஜுக்கே கொடுத்துள்ளார். இன்னமும் பெயரிடப்படாத இந்தப் படத்தின் இசை டி இமான். ஹீரோயின் உள்ளிட்ட விவரங்கள் இரண்டொரு நாளில் வெளியாக உள்ளது.

ஓஹோ பிக்சர்ஸ் என்ற நிறுவனம் தயாரிக்கிறது (கடைசியில் நாகேஷ் கற்பனையில் தமாஷ் செய்ய ஓஹோ புரொடக்ஷன்ஸ் உருவாகியே விட்டது!)