வாரிசு படம் பாப்பீங்களா.. இல்ல துணிவா..மழுப்பலாக பதிலளித்த வடிவேலு!

வாரிசு

விஜய் நடித்துள்ள வாரிசு திரைப்படம் ஜனவரி 12 ந் தேதி வெளியாக உள்ளது. தமிழ், தெலுங்கு என இரண்டு மொழிகளில் வெளியாக உள்ள படத்தில் ராஷ்மிகா,சரத்குமார்,பிரகாஷ் ராஜ், சங்கீதா ஆகியோர் நடித்துள்ளனர். இத்திரைப்படத்தின் இசைவெளியீட்டு விழா நேற்று கோலாகலமாக நேரு ஸ்டேடியத்தில் நடைபெற்றது.

பாட்டு பாடி அசத்திய விஜய்

இந்த விழாவில் கலந்து கொண்ட விஜய் ரஞ்சிதமே ரஞ்சிதமே பாடலை பாடி அசத்தினார். பாட்டு பாடியது மட்டும் இல்லாமல் அந்த பாடலுக்கு மாஸாக நடனமும் ஆடி இருந்தார். அவர் நடனம் ஆடிய வீடியோவை இணையத்தில் அவரது ரசிகர்கள் டிரண்டாக்கி வருகின்றனர்.

நடிகர் வடிவேலு

இந்நிலையில், திருச்செந்தூர் சுப்பிரமணிய சுவாமி கோவிலில் சாமி தரிசனம் செய்த வடிவேலு, செய்தியாளர்களிடம் பேசினார். அப்போது, திருச்செந்தூர் முருகன் கோவில் எனக்கு பிடித்தமான கோவில், பல கோயில்கள் இருந்தாலும் இந்த கோவிலுக்கு வந்து முருகனை தரிசிக்கும் போது மனதிற்கு அமைதி கிடைக்கும். உங்களுக்கு எந்த மனக்குறை இருந்தாலும் இங்கு வந்து முருகனை ஒருமுறை தரிசனம் செய்யுங்கள், நிச்சயம் உங்கள் மனக்குறை நீங்கும் நீங்கள் மகிழ்ச்சியாக இருப்பீர்கள் என்றார்.

வாரிசா...துணிவா

இதையடுத்து, செய்தியாளர்கள் பொங்கலுக்கு வெளியாக இருக்கு வாரிசு மற்றும் துணிவு இதில் எந்த படத்தை நீங்கள் பார்ப்பீர்கள் என்று கேட்டனர். அது பற்றி எனக்கு தெரியவில்லையே என சிரித்துக்கொண்டே பதிலளித்த வடிவேலு, வாரிசு, துணிவு ஆகிய இரு படங்களுமே வெற்றியடைய வேண்டும். தயாரிப்பாளர்கள் நன்றாக இருக்க வேண்டும். சினிமா நன்றாக இருந்தால் தான் அனைவரும் நன்றாக இருக்க முடியும் என்றார்.

அடுத்தடுத்த படங்களில் நடிக்கிறேன்

என்னுடன் யார் நடிக்க வருகிறார்களோ அவர்களுடன் இணைந்து நடிக்க வேண்டியதுதான். அடுத்ததாக மாமன்னன், சந்திரமுகி-2, விஜய் சேதுபதியின் புதிய படம் என நிறைய படங்களில் நடித்து வருகிறேன். நாய் சேகர் ரிட்டர்ன்ஸ் படம் வெற்றிகரமாக 3ஆவது வாரம் ஓடிக் கொண்டிருக்கிறது. குடும்பத்துடன் பார்க்க வேண்டிய படம். பலரும் படத்தை பார்த்துவிட்டு நன்றாக இருப்பதாக வாழ்த்தினார்கள் என்றார்.