வெறித்தனம் தான் போங்க.. விஜய்சேதுபதியின் முதல் பாலிவுட் படம்.. மும்பைக்கார் ஃபர்ஸ்ட் லுக் ரிலீஸ்!

மாநகரம் ரீமேக்

மாஸ்டர் படத்தை இயக்கிய இயக்குநர் லோகேஷ் கனகராஜின் அறிமுக படமான மாநகரம் தமிழில் மிகப்பெரிய வெற்றியை பெற்றது. ஸ்ரீ, சந்திப் கிஷன், ரெஜினா கசாண்ட்ரா, முனிஷ்காந்த், சார்லி உள்ளிட்ட பலர் அந்த படத்தில் நடித்திருந்தனர். அந்த படத்தின் அதிகாரப்பூர்வ இந்தி ரீமேக் தான் மும்பைக்கார்.

பாலிவுட்டில் விஜய்சேதுபதி

பிரபல ஒளிப்பதிவாளர் சந்தோஷ் சிவன் இயக்கத்தில் உருவாகி உள்ள மும்பைக்கார் படத்தின் மூலம் பாலிவுட்டில் அடியெடுத்து வைத்துள்ளார் விஜய்சேதுபதி. அமீர்கானின் படத்தின் மூலம் பாலிவுட்டில் அறிமுகமாவார் என எதிர்பார்க்கப்பட்ட நிலையில், அந்த படத்தில் இருந்து விஜய்சேதுபதி வெளியேறிவிட்டார். மும்பைக்கார் படத்தைத் தொடர்ந்து கத்ரீனா கைஃப் உடனும் ஒரு படத்தில் விஜய்சேதுபதி நடிக்க உள்ளதாகவும் தகவல்கள் வெளியாகி உள்ளன.

மும்பைக்கார் ஃபர்ஸ்ட் லுக்

நடிகர் விஜய்சேதுபதியின் முதல் பாலிவுட் படமான மும்பைக்கார் படத்தின் ஃபர்ஸ்ட் லுக் வெளியாகி உள்ளது. இந்த படத்தில் லீடு ரோலில் பாலிவுட் இளம் நடிகர் விக்ராந்த் மசாய் நடித்துள்ளார். மேலும், தான்யா மணிக்டலா, சஞ்சய் மிஷ்ரா, சச்சின் கடேக்கர் உள்ளிட்ட பிரபலங்கள் நடித்துள்ளனர்.

கூலர்ஸ் போட்டுகிட்டு

இந்த ஃபர்ஸ்ட் லுக் போஸ்டரில் படத்தில் நடித்துள்ள அத்தனை முக்கிய நடிகர்களும் இடம்பெற்றுள்ளனர். எத்தனை பேர் இருந்தாலும், தனக்கே உரிய தனி கெத்தோடு, கூலர்ஸ் போட்டுகிட்டு விஜய்சேதுபதி செம ஸ்டைலாக போஸ்டரில் தெரிகிறார். தமிழில் முனிஷ்காந்த் பண்ண ரோலில் இந்தியில் விஜய்சேதுபதி நடித்துள்ளார்.

விக்ராந்த் மசாய் பிறந்தநாள்

லூட்டேரா, ஹாஃப் கேர்ள் பிரெண்ட், சபாக் உள்ளிட்ட ஏகப்பட்ட சூப்பர் ஹிட் படங்களில் நடித்துள்ள நடிகர் விக்ராந்த் மசாய், இன்று தனது 33வது பிறந்தநாளை கொண்டாடி வருகிறார். அவரது பிறந்தநாளை முன்னிட்டு இந்த ஃபர்ஸ்ட் லுக் போஸ்டர் வெளியாகி உள்ளது. ஃபர்ஸ்ட் லுக்கை வெளியிட்ட விஜய்சேதுபதி விக்ராந்த் மசாய்க்கு தனது வாழ்த்துக்களை தெரிவித்துள்ளார்.