சைவத்திற்கு அசைவ சேவல்... தயாரிப்பாளராக மாறிய விஜய்...

சைவம் படத்தின் ஃபர்ஸ்ட் லுக் வெளியிடப்பட்டுள்ளது.

தலைவா' படத்திற்கு இயக்குனர் விஜய் இயக்கும் புதிய படம் 'சைவம்'. தொடர்ந்து பெரிய ஹீரோக்களை வைத்து இயக்கி வரும் விஜய் இப்படத்தில் புதிய முயற்சியாக 'தெய்வத்திருமகள்' படத்தில் விக்ரமின் குழந்தையாக நடித்த பேபி சாராவை முன்னணி கதாபாத்திரமாக வைத்து இயக்கி வருகிறார்.

இந்த குழந்தைதான் படத்தின் நாயகி. சைவம் படத்திற்கு வேறு நாயகன், நாயகி கிடையாது. இப்படத்தின் படப்பிடிப்புகள் விறுவிறுப்பாக நடைபெற்று வருகின்றன.

தற்போது படத்தின் பர்ஸ்ட் லுக் போஸ்டரை வெளியிட்டிருக்கின்றனர். 'சைவம்' என பெயரிடப்பட்டு அசைவமான சேவலை வைத்து வெளியிடப்பட்டுள்ள இந்த போஸ்டர் அனைவர் மத்தியிலும் எதிர்பார்ப்பை அதிகப்படுத்தியுள்ளது.

இந்த படத்திற்கு விஜய்-யின் ஆஸ்தான இசையமைப்பாளரான ஜீ.வி.பிரகாஷே இசையமைக்கிறார். இப்படத்தை விஜய் தின்க் பிக் ஸ்டுடியோஸ் என்ற தனது சொந்த தயாரிப்பு நிறுவனம் மூலம் தயாரிக்கிறார்.