ஹ்ரித்திக் ரோஷனின் விக்ரம் வேதா டீசர் வெளியானது.. புஷ்கர் காயத்ரி சும்மா மிரட்டியிருக்காங்க!

விஜய்சேதுபதி ரோலில் ஹ்ரித்திக்

க்ரிஷ், தூம் 2, வார் உள்ளிட்ட பல படங்களில் நடித்து பட்டையைக் கிளப்பிய பிரபல பாலிவுட் நடிகர் ஹ்ரித்திக் ரோஷன் நடிப்பில் விக்ரம் வேதா படத்தின் இந்தி ரீமேக் உருவாகி உள்ளது. புஷ்கர் காயத்ரி இயக்கத்தில் வெளியான விக்ரம் வேதா படத்தை பார்த்து ரொம்பவே பிடித்துப் போன நிலையில், அவர்களை வைத்தே இந்த படத்தை உருவாக்கி உள்ளார்.

மாதவன் ரோலில் சைஃப் அலி கான்

இந்தி விக்ரம் வேதா படத்தில் போலீஸ் அதிகாரியாக தமிழில் மாதவன் நடித்த விக்ரம் கதாபாத்திரத்தில் சைஃப் அலி கான் நடித்துள்ளார். இருவரும் மிரட்டும் அதிரடியான டீசர் தற்போது வெளியாகி டிரெண்டாகி வருகிறது. விக்ரம் வேதா படத்தில் வருவதை போல ஒரு கதை சொல்லட்டுமா என வேதா ஆரம்பிக்கும் காட்சிகள் அட்டகாசம்.

புஷ்கர் காயத்ரி மிரட்டல்

விக்ரம் வேதா படத்துக்கு பிறகு தமிழில் பல முன்னணி நடிகர்களை வைத்து படமெடுப்பார்கள் என எதிர்பார்க்கப்பட்ட கணவன் மனைவி இயக்குநர்களான புஷ்கர் காயத்ரி நேரடியாக பாலிவுட்டில் விக்ரம் வேதா படத்தை எடுத்து முடித்துள்ளனர். வரும் செப்டம்பர் 30ம் தேதி திரைக்கு இந்த படம் வருகிறது. புஷ்கர் காயத்ரி கதை மற்றும் தயாரிப்பில் சமீபத்தில் வெளியான சுழல் வெப்சீரிஸும் ரசிகர்கள் கவனத்தை வெகுவாக கவர்ந்தது.

ராதிகா ஆப்தே

கபாலி படத்தில் ரஜினிக்கு ஜோடியாக நடித்த ராதிகா ஆப்தேக்கு சமீப காலமாக பாலிவுட்டில் பெரிய படங்கள் கிடைக்காமல் இருந்த நிலையில், விக்ரம் வேதா படத்தின் மூலம் மீண்டும் பாலிவுட்டில் கலக்க போகிறார் ராதிகா ஆப்தே. தமிழில் ஸ்ரத்தா ஸ்ரீநாத் நடித்த கதாபாத்திரத்தில் தான் இந்தியில் ராதிகா ஆப்தே நடித்துள்ளார்.