அர்னால்டா இருந்து என்ன பிரயோஜனம்...'வணக்கம்' சொல்ல முடியலையே!

துணை கமிஷனருடன் போஸ்

அர்னால்ட் அந்த வழியாக சென்றபோது தங்களது செல்போன்களில் போட்டோ எடுத்து புழகாங்கிதம் அடைந்து கொண்டனர். அர்னால்ட்டை புகைப்படம் எடுக்க, பத்திரிகையாளர்கள் திரளாக நின்றிருந்தனர். அதுமட்டுமின்றி தலைமைச் செயலக ஊழியர்களும் கூட்டமாக குழுமினர். அப்போது திடீரென தனது அருகே நின்று கொண்டிருந்த பூக்கடை பகுதி துணை கமிஷனர் டி.செந்தில்குமார் தோளில் கைபோட்டபடி கட்டி பிடித்து போட்டோவுக்கு போஸ் கொடுத்தார் அர்னால்ட்.

வணக்கம் சொல்லுங்க பார்ப்போம்..

அப்போது அர்னால்டுக்கு ஒரு ஆசை வந்தது. கூடியிருந்த கூட்டத்தை பார்த்து ஏதாவது சொல்ல வேண்டும் என்று விருப்பப்பட்டார். செந்தில்குமாரிடம் நான் என்ன சொல்லலாம் என்று அர்னால்ட் கேட்டார். அதற்கு செந்தில்குமாரும், "வணக்கம்" என்று சொல்லுங்கள். தமிழிலில் மற்றொருவரை மரியாதையாக கூறும் வார்த்தை இது என்று செந்தில்குமார் விளக்கம் அளித்தார்.

வாயடைத்த அர்னால்ட்

இதையடுத்து கூட்டத்தை பார்த்து கையசைத்த, அர்னால்டு, வணக்கம் என்று கூற முயன்றார். ஆனால் அவரது வாயில் வணக்கம் என்ற வார்த்தை நுழையவில்லை. இதுகுறித்து துணை கமிஷனர் செந்தில்குமார் கூறுகையில் "வணக்கம் என்று கூற அர்னால்ட் ஆசைப்பட்டார், முயற்சியும் செய்தார். ஆனால் அவரால் அந்த வார்த்தையை உச்சரிக்க முடியவில்லை" என்று செந்தில்குமார் கூறினார்.

தமிழின் பாரம் அதிகம்

எந்த வசனத்தையும் எளிதில் கற்றுக்கொள்ளும் தன்மை கொண்டவர்கள் நடிகர்கள். அதிலும் ஹாலிவுட் திரைப்பட நடிகரான அர்னால்ட் தனது பலமான உடல்கட்டுக்காக பெயர் பெற்றவர். ஆனால் தொன்மை தமிழின் பாரத்தை, அவரது நாவால் சுமக்க முடியவில்லை என்றுதான் கூற வேண்டும்.