அதெல்லாம் இல்லைங்க... என் கல்யாணம் பத்தி நானே சொல்றேன்... யோகிபாபு இப்படி சொல்றாரே?

திருமணத் தகவல்

இந்நிலையில் காமெடி நடிகர் யோகி பாபுவுக்கு திருமணம் முடிவாகியுள்ளதாக தகவல் வெளியானது. கடந்த சில மாதங்களாகவே யோகி பாபுவுக்கு திருமணம் என அடிக்கடி தகவல் பரவியது. சமீபத்தில் துணை நடிகை ஒருவருடன் யோகி பாபு இருக்கும் போட்டோ வைரலானது. ஆனால் போட்டோவில் இருக்கும் பெண்ணுக்கும் தனக்கும் எந்த சம்பந்தமும் இல்லை என்று யோகி பாபு விளக்கம் அளித்திருந்தார்.

செல்பி புகைப்படம்

சம்பந்தப்பட்ட அந்தப் பெண் ஒரு துணை நடிகை. அவர், ஒரு படத்தின் ஷூட்டிங்கில் யோகி பாபுவுடன் அந்த செல்பியை எடுத்ததாகத் தெரிவித்ததால் பிரச்னை முடிந்தது. இந்நிலையில் அவருக்குத் திருமணம் நிச்சயமாகியிருப்பதாக பரபரப்பு தகவல் வெளியானது. இதனை நடிகர் யோகி பாபுவும் உறுதி செய்ததாகவும், இது பெற்றோர் பார்த்து நிச்சயித்த திருமணம் என்றும் அவர் தெரிவித்ததாகவும் செய்திகள் வெளியாயின.

திருத்தணி கோயிலில்

இதையடுத்து நடிகர் யோகி பாபு திருமணம் வரும் 5 ஆம் தேதி திருத்தணி முருகன் கோவிலில் எளிமையான முறையில் நடைபெறவுள்ளதாகவும் குடும்பத்தினர் மற்றும் நெருங்கிய உறவினர்கள் மட்டுமே இதில் பங்கேற்பார்கள் என்றும் அதற்காக ஏற்பாடுகளை இரண்டு குடும்பத்தினரும் செய்து வருவதாகக் கூறப்பட்டது.

தவறானது

இந்நிலையில் இதை யோகிபாபு மறுத்துள்ளார். என் திருமணம் பற்றி வந்த தகவல் தவறானது. என் திருமணம் பற்றி நானே அறிவிப்பேன். எனக்கு மணப்பெண் தேடிக் கொண்டிருக்கின்றனர். இன்னும் முடிவாகவில்லை. கண்டிப்பாக இந்த வருடம் எனக்கு திருமணம் நடக்கும். முடிவானதும் நானே அறிவிக்கிறேன் என்று கூறியுள்ளார்.