T20 World Cup 2026: இந்திய அணி ஆடும் போட்டிகள் முழு அட்டவணை.. முதல் மேட்ச் எப்போது? எங்கே பார்ப்பது?

By Aravinthan

Updated: Friday, February 6, 2026, 10:51 [IST]

மும்பை: கிரிக்கெட் ரசிகர்கள் ஆவலுடன் எதிர்பார்த்துக்கொண்டிருந்த 2026 ஐசிசி டி20 உலகக்கோப்பைத் தொடர் வரும் சனிக்கிழமை (பிப்ரவரி 7) முதல் தொடங்கவுள்ளது. நடப்புச் சாம்பியனான இந்திய அணி, தொடரின் முதல் நாளிலேயே தனது முதல் போட்டியில் களமிறங்குகிறது.

ரோஹித் சர்மா தலைமையில் கடந்த முறை கோப்பையை வென்ற இந்திய அணி, இம்முறை சூர்யகுமார் யாதவ் தலைமையில் கோப்பையைத் தக்கவைக்கும் முனைப்பில் உள்ளது. குரூப் ஏ பிரிவில் இடம்பெற்றுள்ள இந்திய அணி, தனது முதல் லீக் ஆட்டத்தில் அமெரிக்க அணியை எதிர்கொள்கிறது.

T20 World Cup 2026 India s World Cup Schedule Full Fixtures Match Timings and Venue Details

முதல் போட்டி விவரம்

இந்திய அணி தனது முதல் போட்டியைச் சொந்த மண்ணான மும்பையில் உள்ள வான்கடே மைதானத்தில் விளையாடுகிறது. பிப்ரவரி 7ஆம் தேதி (சனிக்கிழமை) நடைபெறும் இந்தப் போட்டி இந்திய நேரப்படி இரவு 7:00 மணிக்குத் தொடங்குகிறது.

எதில் பார்ப்பது?

இந்திய அணியின் போட்டிகளை ஸ்டார் ஸ்போர்ட்ஸ் தொலைக்காட்சி அலைவரிசைகளில் நேரலையாகக் காணலாம். மொபைல் மற்றும் இணையதள வழியாகப் பார்க்க விரும்புபவர்கள் ஜியோ ஹாட்ஸ்டார் செயலியைப் பயன்படுத்தலாம்.

குரூப் ஏ நிலவரம்

இந்த உலகக்கோப்பைத் தொடரில் இந்தியா 'குரூப் ஏ' பிரிவில் இடம்பெற்றுள்ளது. இந்தியாவைத் தவிர்த்து பாகிஸ்தான், நெதர்லாந்து, நமீபியா மற்றும் அமெரிக்கா ஆகிய அணிகள் இந்தப் பிரிவில் உள்ளன. ஒவ்வொரு அணியும் தங்கள் பிரிவில் உள்ள மற்ற அணிகளுடன் தலா ஒரு முறை மோத வேண்டும். புள்ளிப்பட்டியலில் முதல் இரண்டு இடங்களைப் பிடிக்கும் அணிகள் சூப்பர் 8 சுற்றுக்குத் தகுதி பெறும்.

“வெறும் 3 மணி நேரத்தில் உலகக்கோப்பையில் இருந்து பாகிஸ்தான் வெளியேறும்”.. ஐஸ்லாந்து கிரிக்கெட் கலாய்!

இந்திய அணியின் முழு போட்டி அட்டவணை:

இந்திய அணி தனது லீக் சுற்றுப் போட்டிகளை மும்பை, டெல்லி, அகமதாபாத் மற்றும் கொழும்பு ஆகிய மைதானங்களில் விளையாடவுள்ளது. இந்திய அணி ஆட உள்ள நான்கு குரூப் சுற்றுப் போட்டிகள் விவரம் -

முதல் போட்டி - இந்தியா x அமெரிக்கா: பிப்ரவரி 7, 2026 (சனிக்கிழமை), வான்கடே மைதானம், மும்பை - இரவு 7:00 மணி.
2வது போட்டி - இந்தியா x நமீபியா: பிப்ரவரி 12, 2026 (வியாழக்கிழமை), அருண் ஜெட்லி மைதானம், டெல்லி - இரவு 7:00 மணி.
3வது போட்டி - இந்தியா x பாகிஸ்தான்: பிப்ரவரி 15, 2026 (ஞாயிற்றுக்கிழமை), ஆர். பிரேமதாசா மைதானம், கொழும்பு (இலங்கை) - இரவு 7:00 மணி.
4வது போட்டி - இந்தியா x நெதர்லாந்து: பிப்ரவரி 18, 2026 (புதன்கிழமை), நரேந்திர மோடி மைதானம், அகமதாபாத் - இரவு 7:00 மணி.

IND vs PAK: “பிளீஸ் இந்தியாவுடன் விளையாடுங்க இல்லைனா”.. பாகிஸ்தானுக்கு இலங்கை உருக்கமான கடிதம்

சூப்பர் 8 சுற்று

லீக் சுற்றுகள் முடிவடைந்த பிறகு, பிப்ரவரி 21ஆம் தேதி முதல் சூப்பர் 8 சுற்றுப் போட்டிகள் தொடங்கவுள்ளன. குரூப் ஏ பிரிவில் இந்தியா முதலிடம் அல்லது இரண்டாம் இடம் பிடித்தால் மட்டுமே அடுத்த சுற்றுக்கு முன்னேற முடியும். நடப்புச் சாம்பியனான இந்தியா, சொந்த மண்ணில் விளையாடுவதால் லீக் சுற்றில் ஆதிக்கம் செலுத்தும் என எதிர்பார்க்கப்படுகிறது.

Credit: Mykhel