ஓடிடியில் மிரட்ட வரும் இன்ஸ்பெக்டர் அவிநாஷ் சீசன் 2.. ட்ரெய்லர் தெறிக்குதே.. ரிலீஸ் எப்போ?

மும்பை: மிகுந்த எதிர்பார்ப்புக்கு மத்தியில, 'இன்ஸ்பெக்டர் அவிநாஷ் சீசன் 2' குற்றத் திரில்லர் தொடரின் ட்ரெய்லர் வெளியாகி, ரசிகர்கள் மத்தியில் பெரும் வரவேற்பைப் பெற்றுள்ளது. ரன்தீப் ஹூடா முன்னணி கதாபாத்திரத்தில் நடிக்கும் இத்தொடர், அதிக அதிரடியுடன் பரபரப்பான கதைக்களத்துடன் மீண்டும் வருகிறது. முதல் சீசனின் பாராட்டுகளைத் தொடர்ந்து, இப்புதிய சீசன் பிரம்மாண்டமாகவும், தீவிரமாகவும் உருவாகியுள்ளது.

ஜியோ ஸ்டுடியோஸ் தயாரிப்பில், நீரஜ் பாதக் இயக்கியுள்ள இத்தொடரில் உர்வஷி ரௌதேலா, அமித் சியல், அபிமன்யு சிங், ராஜ்நீஷ் டுகல், ஷாலின் பானோத், ஃப்ரெடி தருவாலா ஆகியோர் முக்கிய நட்சத்திரங்களாக நடித்துள்ளனர்.

1990களில் உத்தரப் பிரதேசத்தின் அதிர்ச்சிகரமான பின்னணியில் அமைக்கப்பட்டுள்ள புதிய சீசன், இன்ஸ்பெக்டர் அவிநாஷ் மிஷ்ரா தனது தனிப்பட்ட வாழ்க்கையின் பெரிய சோதனையை எதிர்கொள்ளும் தருணத்தைக் காட்டுகிறது. அவரது மகன் கொலையில் சிக்க, திருமண வாழ்க்கையும் சீர்குலைவதால், நீதி நிலைநாட்ட சட்ட வரம்புகளை மீறி ஒரு தனிப்பட்ட போராட்டத்தில் தள்ளப்படுகிறார் அவிநாஷ்.

வெளியான ட்ரெய்லர், அவிநாஷுக்கும், சக்திவாய்ந்த குற்றம்-அரசியல்-ஊழல் கூட்டணிக்கிடையேயான கடும் மோதலை வெளிப்படுத்துகிறது. குற்றத் தலைவன் ஷேக் மற்றும் மர்மமான தேவி தங்கள் ஆயுதக் கடத்தல் வலையமைப்பை விரிவுபடுத்தும் வேளையில், நண்பர்-எதிரி எல்லைகள் மங்குகின்றன. அமைப்பினுள் இருந்தே நடக்கும் துரோகம் காரணமாக, அவிநாஷ் சஸ்பெண்ட் செய்யப்பட்டு கைது செய்யப்படுகிறார் - இது அவரை ஒரு பெரிய சதியின் கைப் பாவையாக மாற்றுகிறது.

முந்தைய சீசனை விடப் பெரிய அளவில் உருவாக்கப்பட்ட இச்சீசன், வெடிக்கும் அதிரடி காட்சிகளும், தீவிரமான மோதல்களும், உணர்ச்சிகரமான தருணங்களும் நிறைந்ததாக உள்ளது. நீதி கிடைக்க என்ன விலை கொடுக்கப்படும் என்பதை இத்தொடர் ஆழமாக ஆராய்கிறது.

ரன்தீப் ஹூடா இச்சீசன் குறித்துக் கூறுகையில், "இந்த சீசன் அவிநாஷை முழுமையாகச் சோதிக்கிறது. அவர் குற்றத்துக்கு எதிராக மட்டும் அல்ல, தனது குடும்பம், உண்மை மற்றும் வாழ்விற்காகப் போராடுகிறார். இது மிகவும் தீவிரமான பயணம்" என்றார்.

நடிகை உர்வஷி ரௌதேலா, 'இன்ஸ்பெக்டர் அவிநாஷ் சீசன் 2 மிகவும் பெரியதும் அதிரடியானதும். இந்த கதையின் ஒரு பகுதியாக இருப்பது எனக்கு மிகுந்த மகிழ்ச்சி. ஒவ்வொரு காட்சியும் அதிக தீவிரத்தைக் கொண்டது' எனப் பகிர்ந்து கொண்டார். இயக்குனர் நீரஜ் பாதக், "முதல் சீஸன் வெற்றியின் தொடர்ச்சியாக, இச்சீசன் இன்னும் சிக்கலான, தீவிர சூழ்நிலைகளுக்குள் கதையைக் கொண்டு செல்கிறது. இந்த முறை போராட்டம் மிகத் தனிப்பட்டதாக மாறுகிறது" என விவரித்தார்.

ஜியோ ஸ்டுடியோஸ் வழங்கும் இந்தத் தொடரை ஜ்யோதி தேஷ்பாண்டே, நீரஜ் பாதக், கோல்ட் மவுண்டன் பிக்சர்ஸ் மற்றும் கிரிஷன் சௌதரி ஆகியோர் தயாரித்துள்ளனர். கதை மற்றும் திரைக்கதையை நீரஜ் பாதக், சஞ்சய் மசூம், சமீர் அரோரா ஆகியோர் எழுதியுள்ளனர். அமைப்பே அவருக்கு எதிராகத் திரும்பும்போது, ஒருவன் மட்டுமே தனியாளாக நிற்கிறான். 'இன்ஸ்பெக்டர் அவிநாஷ் சீசன் 2' மே 15, 2026 முதல் JioHotstar-ல் ஸ்ட்ரீம் செய்யப்படும்.