எழுத்துக் காதலன் நா முத்துக்குமாரின் பிறந்தநாள் இன்று.. அவரைப் பற்றி தெரிஞ்சுக்கலாமா!

சினிமா பாடல்கள் மற்றும் இலக்கியம் என இரண்டையும் தனது தோள்களில் சுமந்தவர் பிரபல பாடலாசிரியர் நா முத்துக்குமார்.

கடந்த 2016ல் இவர் உடல்நலக்குறைவால் காலமானார். இவரது மனைவியின் பெயர் ஜீவலட்சுமி.

இவர் பிரபல இயக்குநர் பாலுமகேந்திரா மற்றும் பாடலாசிரியர் அறிவுமதியை தனது குருக்களாக ஏற்றுக் கொண்டார்.

தன்னுடைய 4வது வயதிலேயே தன்னுடைய தாயை இழந்த முத்துக்குமார், தந்தையால் வளர்க்கப்பட்டார்.

கடந்த 2012ல் வெளியான இவரது படைப்பான அணிலாடும் முன்றிலுக்கு இவரது அப்பாவே உத்வேகமாக இருந்ததாக இவர் தெரிவித்திருந்தார்.

இவருடைய அப்பா நாகராஜன், தமிழ் ஆசிரியர். இவரிடம் 5000க்கும் மேற்பட்ட அரிய புத்தகங்கள் இருந்தது. இதையடுத்து இயல்பாகவே முத்துக்குமாருக்கு இலக்கியத்தில் ஆர்வம் ஏற்பட்டது.

தமிழ் மொழியின் மீது ஏற்பட்ட காதலால் இரட்டை டாக்டரேட் பட்டங்களை இவர் பெற்றுள்ளார்.

பாலு மகேந்திராவிடம் 4 ஆண்டுகள் உதவி இயக்குநராக பணிபுரிந்த முத்துக்குமார் அங்குதான் வாழ்க்கை பாடத்தை கற்றுக் கொண்டதாக தெரிவித்துள்ளார்.

சீமானின் இயக்கத்தில் உருவான வீரநடை படத்திற்குதான் முதல்முதலாக பாடல் எழுதினார் முத்துக்குமார். ஆனால் இந்தப் படம் தாமதமாக ரிலீசான நிலையில் இந்தப் பாடல் அவரது 32வது பாடலாக வெளியானது.