Vadakkupatti Ramasamy Review: வடக்குப்பட்டி ராமசாமி விமர்சனம்.. சந்தானத்துக்கு சக்சஸா? சறுக்கலா?

நடிகர்கள்: சந்தானம், மேகா ஆகாஷ்
இசை: ஷான் ரோல்டன்
நேரம்: 2 மணி நேரம் 26 நிமிடங்கள்
இயக்குநர்: கார்த்திக் யோகி

சென்னை: "ஊருக்குள்ள சாமியே இல்லைன்னு சொல்லிட்டு திரிஞ்சானே அந்த ராமசாமியா" என்கிற வசனத்தை டிரெய்லரில் வைத்து சர்ச்சை கிளம்பிய நிலையில், அதுவே இந்த படத்துக்கு புரமோஷனாக மாறும் என சந்தானம் பேசியது போல முதல் நாளே சந்தானம் படத்துக்கு மக்கள் கூட்டம் வரத் தொடங்கி விட்டனர். டிரெய்லரில் அந்த வசனம் இடம் பெறுவதற்கும் படத்துக்கும் என்ன சம்பந்தம்? சந்தானம் கையில் சூலம் எல்லாம் இருக்கிறதே? என ரசிகர்களுக்கு எழுந்த ஆர்வத்துக்கு சற்றும் குறைவைக்காத அளவுக்கு கடவுளை வைத்தே கதையை உருவாக்கி ஸ்கோர் செய்து விட்டார் இயக்குநர் கார்த்திக் யோகி.

டிக்கிலோனா படத்தில் டைம் டிராவல் கதையை வைத்து அவர் பண்ண காமெடி கதை ரசிகர்களை விழுந்து விழுந்து சிரிக்க வைத்தது. அந்த படத்திலேயே நிழல்கள் ரவியை நல்லா யூஸ் பண்ணியிருப்பார். இந்த படத்தில் இரண்டாம் பாகத்தில் நிழல்கள் ரவியின் காமெடி டிராக் ரசிகர்களுக்கு ஃபன் ரோலர்கோஸ்டர் ரைடு கியாரண்டி என்றே சொல்ல வைக்கிறது. வடக்குப்பட்டி ராமசாமி படத்தின் பிளஸ் மற்றும் மைனஸ் என முழு விமர்சனத்தை இங்கே பார்க்கலாம் வாங்க..

வடக்குப்பட்டி ராமசாமி கதை: சிறு வயதில் பானை செய்து விற்றுக் கொண்டிருக்கும் சிறுவனாக வடக்குப்பட்டி ராமசாமியை காட்டுகின்றனர். ஆனால், பானையை யாருமே வாங்கவில்லை என்பதால் வறுமையில் இருந்து மீள்வதற்காக என்ன செய்யலாம் என யோசிக்கும் சிறுவன், மக்கள் கடவுள் பக்தியால் அதீத மூடநம்பிக்கை உடையவர்களாக அந்த கிராமத்தில் உள்ளதை அறிந்து கொண்டு அவர்களை அந்த கடவுளின் பெயரால் எப்படி ஏமாற்றி சம்பாதிக்கலாம் என பல வேலைகளை பார்த்து ஒரு கட்டத்தில் கோயில் எல்லாம் கட்டி சம்பாதித்து வருகிறார். அந்த கிராமத்துக்கு வரும் ஒரு பேராசை பிடித்த தாசில்தார் இதை விட அதிகம் சம்பாதிக்க வேண்டும் என நினைக்கும் வேளையில் அவரிடம் இந்த வடக்குப்பட்டி ராமசாமி சிக்கினாரா? தப்பித்தாரா? என்பது தான் கதை.

நடிகர்கள் பர்ஃபார்மன்ஸ்: சந்தானம் வடக்குப்பட்டி ராமசாமியாகவே மாறிவிட்டார். சிறுத்தை படத்தில் காட்டுப்பூச்சியாக கலக்கிய சந்தானத்துக்கு இதுபோன்ற கோல்மால், பித்தலாட்டம் பண்ணுகிற கதாபாத்திரங்கள் எல்லாம் அல்வா சாப்பிடுற விஷயம் தான். ஹீரோயின் மேகா ஆகாஷ் கொடுத்த ரோலில் நச்சென நடித்திருக்கிறார். முதல் பாதியில் மாறன் மற்றும் சேஷுவின் காமெடி படத்தை நகர்த்துகிறது. இரண்டாம் பாதியில் நிழல்கள் ரவி, எம்.எஸ். பாஸ்கர், ரவி மரியா, ஜான் விஜய், இட்டிஸ் பிரசாந்த் என ஏகப்பட்டபேர் இணைந்து படத்தை தங்களின் தேர்ந்த நடிப்பால் காப்பாற்றியுள்ளனர். அனைவரையும் வைத்துக் கொண்டு காமெடி சீன் கொடுக்காமல் ஏமாற்றாமல் கார்த்திக் யோகி எழுதிய திரைக்கதை மற்றும் காமெடி காட்சிகள் தான் படத்தை வெற்றிப் படமாக மாற்றியுள்ளது.

பிளஸ்: கண்ணும் கண்ணும் கொள்ளையடித்தால் படத்தில் ஹீரோ நெகட்டிவ் கேரக்டர் என்றாலும், அவன் கடைசி வரை மாட்டிக் கொள்ளாமல் புத்தியால் எப்படி தப்பிக்கிறான் என்பதை காட்டிய விதத்தில் அந்த படம் ஹிட் அடித்தது. அதே போல இந்த படத்திலும் ஹீரோ ஃபிராடு தான் என்றாலும், அப்படியொரு கதாபாத்திரத்தை வைத்துக் கொண்டு மூடநம்பிக்கையில் மக்கள் எப்படி சிக்கித் தவிக்கின்றனர் என்கிற பகுத்தறிவை போகிற போக்கில் சொல்லிய விதம் படத்துக்கு பிளஸ். ஷான் ரோல்டனின் இசை படத்திற்கு பெரிய பலம்.

மைனஸ்: முதல் பாதியில் சில இடங்களிலும், இரண்டாம் பாதியில் வரும் அந்த கண்ணிவெடி காமெடி போர்ஷனும் வேறலெவலில் தியேட்டரையே சிரிப்பலையில் ஆழ்த்தியது. ஆனால், சில இடங்கள் மற்றும் சில கதாபாத்திரங்கள் திணிக்கப்பட்டது போலவே உள்ளது. 74களில் படம் நடப்பது போல காட்டப்பட்டது இப்போ நடக்கிறது என காட்டினால் சிக்கல் வரும் என்கிற சமாளிபிகேஷன் போலவே தெரிகிறது. ஒரு சில மைனஸ் இருந்தாலும், ஒட்டுமொத்தமாக இந்த வடக்குப்பட்டி ராமசாமி படத்தை தியேட்டருக்கு குடும்பத்துடன் சென்று பார்த்து சிரித்து ரசிக்கலாம். காமெடி படத்திற்கு செல்வதே கதைக்காக அல்ல, கடுப்பேத்துற மாதிரி காமெடி பண்ணாமல் கலகலன்னு சிரிக்க வைக்கிற காமெடியா இருக்கணும். அது இந்த படத்தில் சிறப்பாக வொர்க்கவுட் ஆகியிருக்கிறது.