Sivi 2 movie Review: சிவி முதல் பாகத்தை போல பயமுறுத்தியதா சிவி 2? விமர்சனம் இதோ!

என்ன கதை

காஞ்சனா 2 படத்தில் வருவதை போல பேய் இருப்பதாக ஃபேக்காக வீடியோ எடுக்கும் இளைஞர்கள் கூட்டம் யூடியூபில் அதை வெளியிட்டு பணம் சம்பாதித்து வருகின்றனர். அவர்களை காணவில்லை என அவர்களது பெற்றோர்கள் முதல் ஷாட்டிலேயே புகார் அளிக்கின்றனர். பணத்தாசை பிடித்த யூடியூபரை ஒருவர் நீங்க ஏன் அந்த பேய் ஆஸ்பத்திரின்னு சொல்ற இடத்துக்கே போய் வீடியோ எடுக்கக் கூடாதுன்னு சிக்க வைக்க, அங்கே சென்று வீடியோ எடுத்தவர்கள், திரும்பி வந்தார்களா? இல்லையா? என்பது தான் கதை.

சிவி முதல் பாகம்

தேங்காய் சீனிவாசன் பேரன் யோகி, ஜெயஸ்ரீ, அனுஜா நடிப்பில் கடந்த 2007ம் ஆண்டு வெளியான சிவி முதல் பாகத்தில், நாயகன் யோகிக்கு கழுத்தில் அதீத வலி இருக்கும். அமானுஷ்ய விஷயங்களை தேடிச் செல்லும் அவனுக்கு ஏன் அப்படியொரு வலி இருக்கிறது என்பதை கண்டறிய போராடுவான். கடைசியில் பேய் ஒன்று அவன் கழுத்திலேயே உட்கார்ந்து இருப்பதை காட்டும் போது ஒட்டுமொத்த ரசிகர்களும் திகில் அடைவார்கள். அதே போல இந்த படமும் வித்தியாசமாக இருக்கும் என எதிர்பார்த்து சென்றவர்களை இயக்குநர் பெரிதும் ஏமாற்றி விட்டார்.

பயமுறுத்துதா

சிவி முதல் பாகத்தை போலவே சிவி 2 பயமுறுத்துதா? என்கிற கேள்விக்கு ஆம், இல்லை என இரு பதில்களை சொல்லலாம். சில காட்சிகள் மிரட்டலாகவே இருந்தாலும், செல்போன் கேமராவில் படமாக்கப்பட்டது போல விஷுவல்ஸ் படு மோசமாக பல இடங்களில் பல் இளிப்பது பெரும் பிர்ச்சனையாக சிவி 2வுக்கு மாறிவிட்டது. 15 ஆண்டுகளில் தொழில்நுட்பங்கள் பெரிதும் வளர்ந்திருக்கும் நிலையில், இன்னமும் விட்டலாச்சாரியா படம் போல எடுத்தால் யார் தான் பாஸ் பார்ப்பாங்க! என தியேட்டரில் ரசிகர்களே திட்டுகின்றனர்.

பலம்

தேங்காய் சீனிவாசன் பேரன் யோகியுடன் சேர்ந்து நடிகர் சரண்ராஜின் மகன் தேஜா சரண்ராஜும் இந்த படத்தில் லீடு ரோலில் நடித்துள்ளார். இவர்களை எல்லாம் ஓவர்டேக் செய்யும் விதமாக டெக் எக்ஸ்பெர்ட்டாக வரும் காமெடி நடிகர் சாம்ஸ் இந்த படத்தில் முற்றிலும் மாறுபட்ட ரோலில் மிரட்டி எடுத்திருக்கிறார். ஃபைசலின் இசை சில இடங்களில் பயமுறுத்துவது பலம்.

பலவீனம்

சிவி முதல் பாகத்தை போல சிவி 2 கொஞ்சமும் புதிதாகவோ சுவாரஸ்யமாகவோ இல்லை என்பதே பெரிய மைனஸ். இயக்குநர் சிவி டைட்டிலுக்கே ரசிகர்கள் வருவார்கள் என நினைத்து விட்டாரோ என்னவோ தெரியவில்லை. ஒளிப்பதிவு, விஷுவல் மற்றும் திரைக்கதை ரீதியாக பல இடங்களில் படம் பயங்கரமாக அடி வாங்குகிறது. காமெடி கலந்த பேய் படங்கள் எல்லாம் வேண்டாம், த்ரில்லிங்கான பேய் படம் பார்க்கவே விரும்பும் ரசிகர்கள் தாராளமாக இந்த படத்தை ஒரு முறை தியேட்டரில் பார்க்கலாம்!