அபிஷேக்கை தொடர்ந்து அமிதாப்புக்கு காயம்: விலா எழும்பில் அடி

டிபார்ட்மென்ட் படப்பிடிப்பின்போது அமிதாப் பச்சனுக்கு மார்பு, விலா எழும்பில் அடிபட்டது.

அமிதாப் பச்சன் தற்போது டிபார்ட்மென்ட் என்னும் இந்திப் படத்தில் நடித்து வருகிறார். நேற்றைய படப்பிடிப்பின்போது ஆக்ஷன் காட்சி படமாக்கப்பட்டது. இதில் அமிதாப் பச்சனுக்கு மார்பு, விலா எழும்பில் அடிபட்டது. இதையடுத்து படக்குழுவினர் பதறிப்போனார்கள்.

இது குறித்து அமிதாப் டுவிட்டரில் தெரிவித்துள்ளதாவது,

ஆக்ஷன் காட்சியில் நடிக்கையில் சின்ன விபத்து ஏற்பட்டது. அதில் மார்பு, விலா எழும்பில் உள்காயம் ஏற்பட்டுள்ளது. மூச்சு விடுகையில் வலி உள்ளது. ஆனால் தாங்கக்கூடியது தான் என்று கூறியுள்ளார்.

இதைப் பார்த்தவுடன் அமிதாப்புக்கு போன் மேல் போன், மெசேஜ் மேல் மெசேஜ் பறந்தது. அமிதாப்ஜி என்னாச்சு, இப்பொழுது எப்படி இருக்கிறீர்கள் என்று அத்தனை நலவிசாரிப்புகள். உடனே அமிதாப் யாரும் கவலைப்பட வேண்டாம். பெரிய அடி ஒன்றும் இல்லை என்று டுவீட் செய்துள்ளார்.

நான் வழக்கமாக டுவீட் செய்வது போல் தான் இந்த விபத்து பற்றியும் குறிப்பிட்டேன். ஆனால் ஊடகங்கள் இதைப் பெரிதுபடுத்திவிட்டன. நான் நாளைக்கே ஷூட்டிங் போகப்போகிறேன். அதனால் யாரும் கவலைப்பட வேண்டாம் என்று டுவீட் செய்துள்ளார்.

அண்மையில் தான் போல் பச்சன் படப்பிடிப்பில் அபிஷேக் பச்சனுக்கு அடிபட்டு 6 தையல் போட்டனர் என்பது குறிப்பிடத்தக்கது.

ராம் கோபால் வர்மா தயாரித்து இயக்கி வரும் டிபார்ட்மென்ட் படத்தில் ராணா டக்குபதி, சஞ்சய் தத், நசீருத்தீன் ஷா, கங்கனா ரனோத், ரவீனா டாண்டன் ஆகியோர் நடிக்கின்றனர்.