வைரஸ் காய்ச்சலால் மோகன்லால் அவதி... ப்ரியதர்ஷன் படப்பிடிப்பு ரத்து!

By Shankar

| Published: Saturday, October 8, 2011, 16:26 [IST]

பிரபல நடிகர் மோகன்லால் வைரஸ் காய்ச்சலால் பாதிக்கப்பட்டுள்ளதால், ப்ரியதர்ஷன் இயக்கத்தில் அவர் நடித்துவந்த அரபியும் ஒட்டகமும் பி மாதவ நாயரும் படப்பிடிப்பு ரத்து செய்யப்பட்டது.ய

இப்படத்தின் முதல்கட்ட படப்பிடிப்பு திருவனந்தபுரத்தில் நடந்தது. இதில் மோகன்லால் கலந்து கொண்டு நடித்து வந்தார்.

இந்த நிலையில் கடந்த 2 நாட்களாக காய்ச்சலால் அவதிப்பட்ட அவர் அவ்வப்போது சிகிச்சை பெற்று படப்பிடிப்பில் கலந்து கொண்டார். இதற்கிடையே நேற்று கடுமையான காய்ச்சலால் அவதிப்பட்ட மோகன்லாலுக்கு தொடர்ந்து நடிக்க முடியாத நிலை ஏற்பட்டது.

இதையடுத்து டாக்டர்கள் ஷூட்டிங் ஸ்பாட்டுக்கே வரவழைக்கப்பட்டனர். அவரைப் பரிசோதித்த டாக்டர்கள் மோகன்லாலுக்கு வைரஸ் காய்ச்சல் பாதிப்பு இருப்பதாகவும், சில நாட்கள் அவர் ஓய்வு எடுக்க வேண்டும் என்றும் அறிவுறுத்தினர்.

இதையடுத்து மோகன்லால் திருவனந்தபுரத்தில் உள்ள தனது வீட்டில் ஓய்வு எடுத்து வருகிறார். இதனால் படப்பிடிப்பும் வருகிற 15-ந் தேதி வரை ரத்து செய்யப்பட்டுள்ளது.