வேலைநீக்கம்-சல்மா ஹயேக் கணவர் சிறைபிடிப்பு

Specials

oi-Staff

By Staff

| Published: Saturday, April 4, 2009, 16:22 [IST]

பாரீஸ்: ஆஸ்கர் விருது பெற்ற ஹாலிவுட் பாடகி சல்மா ஹயேக்கின் கணவர் பிரான்காய்ஸ் ஹென்றி பினால்ட்டை, அவரது நிறுவனத்தில் வேலை பார்த்து பின்னர் டிஸ்மிஸ் செய்யப்பட்ட 1,200 ஊழியர்கள் காருக்குள் வைத்துப் பூட்டி சிறை பிடித்ததால் பரபரப்பு ஏற்பட்டது.

பினால்ட் பிரான்ஸின் முன்னணி தொழிலதிபர் ஆவார். சமீபத்தில் தனது இரு நிறுவனங்களைச் சேர்ந்த 1200 ஊழியர்களை பணியிலிருந்து நீக்கினார். பொருளாதார நெருக்கடி நிலையைத் தொடர்ந்து இந்த நடவடிக்கையை அவர் எடுத்தார்.

இதனால் ஆத்திரமடைந்த அந்த ஊழியர்களில் 50 பேர் கடந்த வாரம் பாரீஸில் நடந்த நிறுவன கூட்டத்தில் பங்கேற்க வந்த பினால்ட்டை அவரது காருக்குள் வைத்து சிறை பிடித்தனர்.

இதையடுத்து போலீஸாருக்குத் தகவல் தெரிவிக்கப்பட்டது. கலவரத் தடுப்புப் போலீஸார் விரைந்து வந்து பினால்ட்டை மீட்டனர்.

46 வயதாகும் கோடீஸ்வரரான பினால்ட்டுக்கு, கிறிஸ்டி ஏல நிலையம், குச்சி, கன்வர்ஸ் உள்ளிட்ட பல்வேறு பிரபல நிறுவனங்களில் பங்கு உள்ளது.

சல்மா ஹயேக்கை கடந்த மாதம்தான் கல்யாணம் செய்து கொண்டார் பினால்ட். அவரது முதல் மனைவியின் பெயர் பிரீதா ஸ்டார். இவர் மூலம் பினால்ட்டுக்கு வாலன்டினா என்ற மகள் உள்ளார்.