தமிழ்ப் படம் இப்போதைக்கு இல்லை!-ஏவிஎம்

அடுத்தடுத்து சிவாஜி மற்றும் அயன் என பெரும் வெற்றிப் படங்களைத் தந்தாலும் அடுத்த தமிழ்ப் படம் தயாரிப்பதில் அவ்வளவாக ஆர்வம் காட்டவில்லை ஏவி எம் நிறுவனம்.

இப்போது தமிழுக்கு பதில் தெலுங்குப் படங்கள் தயாரிப்பதில் அதிக கவனம் செலுத்த ஆரம்பித்துள்ளது ஏவிஎம்.

சமீபத்தில் வருண்தேஜ்- விமலாராமன் நடித்த 'எவரைனா எப்புடைனா' எனும் படத்தை வெளியிட்டது ஏவிஎம். அந்தப் படம் எதிர்பாராத வெற்றியைப் பெறவே, மீண்டும் தெலுங்கிலேயே புதிய படத்தைத் தொடங்கிவிட்டது இந்த நிறுவனம்.

ராமாநாயுடுவின் பேரன் ரானா நாயகனாக நடிக்கும் இந்தப் படத்துக்கு லீடர் என தலைப்பிட்டுள்ளனர். இந்தப் படத்தை இயக்குபவர் சேகர் கம்முல. இவர் ஏற்கெனெவே ஹேப்பி டேஸ் எனும் வெற்றிப் படத்தை இயக்கியவர்.

தமிழ் திரையுலகில் இன்னும் சாதகமான சூழல் வரும்போது படம் தயாரிக்கலாம் என அமைதி காக்கிறது ஏவிஎம்.