சென்னையில் வேகமாக பிரபலமாகும் சல்சா டான்ஸ்

By Staff

| Published: Tuesday, July 7, 2009, 14:28 [IST]

சென்னை நகரை சல்சா காய்ச்சல் படு வேகமாக பீடித்துள்ளது. சல்சா நடன பயிற்சிப் பள்ளிகள் பெருமளவில் பெருகி வரும் நிலையில் இதுதொடர்பான நடன நிகழ்ச்சிகளும் இப்போது அதிக அளவில் நடைபெறுகின்றன.

ஸ்பானிஷ் மொழி பேசும் கரீபிய தீவு மக்களால் உருவாக்கப்பட்டதுதான் இந்த சல்சா டான்ஸ். ஆப்பிரிக்க மற்றும் ஐரோப்பிய நடன வடிவங்களின் கலவைதான் இது.

இசையும், நடனமும் இணைந்த அட்டகாசமான டான்ஸ் இது.

இந்த டான்ஸை ஜோடி ஜோடியாகத்தான் ஆட முடியும். தனியாக ஆட முடியாது. தனியாக ஆடும் ஆட்டமும் இருக்கிறது. இருந்தாலும் ஜோடி போட்டு ஆடினால்தான் சல்சாவுக்கே தனி மதிப்பு.

சல்சா என்பதற்கு ஸ்பெயின் மொழியில் மசாலா மணம் என்று பொருள்.

இப்போது சென்னை நகரிலும் சல்சா டான்ஸ் காய்ச்சல் படு வேகமாக பரவி விட்டது. எங்கு பார்த்தாலும் சல்சா கற்றுத் தரப்படும் என போர்டுகளைப் பார்க்கலாம். அதேபோல சல்சா நடன நிகழ்ச்சிகளும் சக்கை போடு போடுகின்றன.

சென்னையில் உள்ள ஹவானாவில் சல்சா நடன நிகழ்ச்சிக்கு ஏற்பாடு செய்யப்பட்டிருந்தது. ஏகப்பட்ட கூட்டம். வந்தவர்களில் பாதிக்கும் மேற்பட்டோர் காதல் ஜோடிகள்தான்.

டிஜே பிளைஸின் கீபோர்ட் இசையுடன் ஆட்டம், பாட்டம் கொண்டாட்டமாக களை கட்டியது சல்சா.

ஆடியவர்களிலேயே அதிகம் கவர்ந்தவர்கள் சுதர்சன்- கரேன் ஜோடி தான். அட்டகாசமான வளைவுகளுடன் அவர்கள் நெளிந்து, வளைந்து ஆடியது கூட ஆடியவர்களை மிரட்டியது.

ஏகப்பட்ட பிரபலங்களையும் கூட இந்த பார்ட்டியில் பார்க்க முடிந்தது.

இரவு ஏற ஏற ஆட்டத்தின் வேகமும் கூடி கரீபியத் தீவுகளே இங்கு இடம் பெயர்ந்து வந்து விட்டதோ என்ற மாயையை ஏற்படுத்தியது.