விஜய்யுடன் கை கோர்க்கும் ரஜினி படத் தயாரிப்பாளர்!

விஜய் நடிக்க, கவுதம் மேனன் இயக்கத்தில் உருவாகும் பிரமாண்ட படம் யோஹன் - அத்தியாயம் ஒன்று.

இந்தப் படத்தை முதலில் கவுதம் மேனனின் போட்டோன் கதாஸ் நிறுவனம் தயாரிக்கும் என்று கூறப்பட்டது. இந்த நிலையில் ஈராஸ் இன்டர்நேஷனல் கவுதம் மேனனுடன் இணைந்து இந்தப் படத்தை தயாரிக்கிறது.

இதனை அதிகாரப்பூர்வமாக ஈராஸ் இன்று அறிவித்துள்ளது. "பிராந்திய மொழி சினிமாவில் தீவிர கவனம் செலுத்தும் முடிவில் உள்ள ஈராஸ், அதன் ஒரு பகுதியாக போட்டோன் கதாஸ் நிறுவனத்துடன் இணைந்து விஜய்யின் இந்தப் படத்தைத் தயாரிக்கிறது," என்று ஈராஸ் நிறுவனத்தின் சுனில் லுல்லா தெரிவித்துள்ளார்.

ஏற்கெனவே ரஜினி நடிக்கும் கோச்சடையான், ராணா ஆகிய படங்களையும், ஷங்கர் இயக்கவிருக்கும் படத்தையும் ஈராஸ்தான் தயாரிக்கிறது.

முதல் முறையாக இப்போது விஜய் நடிக்கும் படத்தை இந்த நிறுவனம் தயாரிப்பது குறிப்பிடத்தக்கது.