'அப்பாவி' சுஹானி!

அப்பாவி என்ற பெயரில் புதிய திரைப்படம் உருவாகிறது. சுஹானி நாயகியாக நடிக்க, கே.பாக்யராஜ் முக்கிய கேரக்டரில் நடிக்கும் இப்படத்தில் கெளதம் நாயகனாக நடிக்கிறார்.

தேவி விஷன்ஸ் பிரைவேட் லிமிடெட் சார்பில் தண்டபாணி தயாரிக்கும் இப்படம் மிகுந்த பொருட்செலவில் தயாராகிறது.

பாஸ் படத்தை இயக்கி வரும் ஆர். ரகுராஜ் அப்பாவியை இயக்குகிறார்.

சமூக விரோத சக்திகளால் நாட்டின் வளர்ச்சி எப்படி பாதிக்கப்படுகிறது என்பதையும், அப்படிப்பட்ட சமூக விரோத சக்தியால் பாதிக்கப்பட்ட ஒரு அப்பாவி எப்படி அவர்களை பழிவாங்குகிறான் என்பதே இப்படத்தின் கதையாகும்.

பழிவாங்கும் காட்சிகளை இந்தியத் திரையுலகில் இதுவரை இல்லாத வகையில் வித்தியாசமாக படம் பிடிக்கிறார்களாம்.

படப்பிடிப்பு சென்னையில் தொடங்கி தொடர்ந்து கர்நாடகா, கேரளாவில் வளருகிறது. ஆகஸ்ட் மாதம் திரைக்கு வர திட்டமிடப்பட்டுள்ளது.

ஜோஷ்வா ஸ்ரீதர் இசையமைக்க, வி.டி.விஜயன் எடிட்டிங்கைக் கவனிக்க, கிருஷ்ணசாமி ஒளிப்பதிவு செய்ய, வைரமுத்து, நா.முத்துக்குமார் பாடல்களை எழுத உருவாகிறது அப்பாவி.