ஹாலிவுட் போகும் அம்பானி!

By Staff

| Published: Tuesday, May 20, 2008, 15:16 [IST]

ரிலையன்ஸ் அனில் திருபாய் அம்பானி குழுமத்தின் மீடியா மற்றும் பொழுது போக்குப் பிரிவான, ரிலையன்ஸ் பிக் என்டர்டெய்ன்மென்ட் நிறுவனம் ஹாலிவுட் படத் தயாரிப்பில் குதிக்கிறது. இதற்காக மிகப் பெரிய நிறுவனங்களுடன் அது ஒப்பந்தம் செய்துள்ளது.

ரிலையன்ஸ் பிக், ஒப்பந்தம் செய்துள்ள நிறுவனங்களில் டாம் ஹாங்க்ஸ், பிராட் பிட், ஜிம் கேரி ஆகியோரின் நிறுவனங்களும் அடக்கம்.

கேன்ஸ் நகரில் நடந்த செய்தியாளர் கூட்டத்தில் இதுதொடர்பாக ரிலையன்ஸ் பிக் நிறுவனத்தின் தலைவர் அமித் கண்ணா கூறுகையில், அடுத்த 2 ஆண்டுகளில் 30 கதைகள் தேர்வு செய்யப்படும். அதில் 10 கதைகளைப் படமாக்க திட்டமிட்டுள்ளோம்.

இந்த ஒப்பந்தத்திற்கு லாஸ் ஏஞ்சலஸைச் சேர்ந்த கிரியேட்டிவ் ஆர்ட்டிஸ்ட்ஸ் ஏஜென்சி உதவியுள்ளது. ரிலையன்ஸ் பிக் ஒப்பந்தம் செய்துள்ள நிறுவனங்கள்: நிக்கோலஸ் கேஜ்-ன் சாட்டர்ன் புரடக்ஷன்ஸ், ஜிம் கேரியின் ஜேசி 23 என்டர்டெய்ன்மென்ட், க்ளூனியின் ஸ்மோக் ஹவுஸ், கொலம்பஸின் 1492 பிக்சர்ஸ், டாம் ஹாங்க்ஸின் பிளேடோன் புரடக்ஷன்ஸ், பிராட் பிட்டின் பி என்டர்டெய்ன்மென்ட், ரோச்சின் எவரிமேன் பிக்சர்ஸ் ஆகியவை ஆகும்.

திரைக்கதைகளின் தன்மையைப் பொறுத்து அவற்றை படமாக்குவோம். இதற்காக கணிசமான தொகை ஒதுக்கப்படும்.

ஹாலிவுட் ஜாம்பவான்களுடன் போட்டி போடும் எண்ணத்தில் நாங்கள் அங்கு நுழையவில்லை. யாருடனும் எங்களுக்குப் போட்டி இல்லை. அனைவருடனும் ஒருங்கிணைந்து செயல்படுவதே எங்களது எண்ணம்.

உலகளாவிய திரைப்பட சந்தை மாறிக் கொண்டு வருகிறது. அந்த மாற்றத்தில் முன்னோடியாக திகழ நாங்கள் விரும்புகிறோம் என்றார்.

உடன் இருந்த பிக் நிறுவனத்தின் கிரியேட்டிவ் ஆலோசகர் பிரசூன் ஜோஷி கூறுகையில், எங்களது ஹாலிவுட் பங்குதாரர்களுக்கு படத் தயாரிப்பு தொடர்பாக நாங்கள் எந்த நிபந்தனையும் விதிக்க மாட்டோம். இருப்பினும் சர்வதேச அளவில் இந்தியா தொடர்பான திரைக்கதைகள் அதிக அளவில் இடம் பெற நாங்கள் முயல்வோம் என்றார்.