தனுஷ் - ஸ்ருதி ஜோடி: இயக்குநர் ஐஸ்வர்யா!

கணவர் தனுஷ் - கமல் மகள் ஸ்ருதி ஜோடியாக நடிக்கும் படத்தை ரஜினி மகள் ஐஸ்வர்யா இயக்குகிறார் என செய்திகள் வெளியாகியுள்ளன.

ரஜினியின் மூத்த மகள் ஐஸ்வர்யா தனுஷ் சில காலம் செல்வராகவனிடம் உதவி இயக்குநராகப் பணியாற்றினார். ஆயிரத்தில் ஒருவன் படத்தின் டைட்டில் கார்டில் அவர் பெயரும் இடம்பெற்றிருந்தது.

பின்னர் தானே கதை வசனம் எழுதி படம் இயக்கப் போவதாக ஐஸ்வர்யா தெரிவித்தார். இதனை தனுஷும் பல பேட்டிகளில் தெரியப்படுத்தியிருந்தார்.

இந்த நிலையில், ஒரு காதல் கதையை படமாக்கும் ஐஸ்வர்யாவின் முயற்சி கைகூடி வந்துள்ளது.

இந்தப் படத்தை கதை திரைக்கதை வசனம் எழுதி இயக்குகிறார் ஐஸ்வர்யா. ஹீரோவாக அவரது கணவர் தனுஷே நடிக்கிறாராம். கமல் மகள் ஸ்ருதி ஹாஸன் ஜோடியாக நடிப்பார் என்று கூறப்படுகிறது.

இந்தப் படத்தை தயாரிக்கப்போவது, தனுஷின் சொந்தப் பட நிறுவனம் என்பது குறிப்பிடத்தக்கது.

சிங்கப்பூரில் ஓய்வெடுத்து வரும் ரஜினி சென்னை திரும்பியதும் இதுகுறித்த அதிகாரப்பூர்வ அறிவிப்பு வெளியாக உள்ளது.