முகப்பு

ஸ்பெஷல்ஸ்

நெருங்கி வருகிறது உற்சாகத் திருநாளான தீபாவளிப் பண்டிகை. இயக்குநர்கள், தயாரிப்பாளர்கள் மற்றும் ஹீரோக்கள் தங்களின் படங்களை தீபாவளிக்கு கொண்டுவரும் முனைப்பில் உள்ளனர்.

இந்த ஆண்டு விஜய்யின் வேலாயுதம், சூர்யாவின் 7-ஆம் அறிவு, தனுசின் மயக்கம் என்ன ஆகிய மூன்று பெரிய பட்ஜெட் படங்கள் தீபாவளிக்கு வருவது உறுதியாகியுள்ளது. இவற்றுக்கான தியேட்டர் புக்கிங்கும் துவங்கிவிட்டன.

தமிழகம் முழுவதும் உள்ள பெரும்பான்மை தியேட்டர்களை இந்த மூன்று படங்களும் ஆக்கிரமித்துக் கொள்ளும் நிலை உள்ளது. இதோடு பரபரப்பாக எதிர்பார்க்கப்படும் ஷாருக்கானின் 'ரா ஒன்' படத்தையும் தமிழில் டப்பிங் செய்து தீபாவளிக்கு வெளியிட ஏற்பாடுகள் நடக்கின்றன.

கடந்த 2007-ல் தீபாவளியன்று இது போல் விஜய்யின் அழகிய தமிழ் மகன், சூர்யாவின் வேல், தனுசின் பொல்லாதவன் படங்கள் மோதியது நினைவிருக்கலாம்.

அப்போது இருந்ததை விட இப்போது 3 நடிகர்களின் ரேஞ்சும் உயர்ந்துள்ளது. வியாபாரமும் உலக அளவில் விரிந்துள்ளது. எனவே எதிர்பார்ப்பு அதிகமாக உள்ளது.

7-ம் அறிவு படத்தில் சூர்யா ஜோடியாக ஸ்ருதி, நடித்துள்ளார். ஏ.ஆர். முருகதாஸ் இயக்கியுள்ளார். உதயநிதி ஸ்டாலினின் ரெட் ஜெயண்ட் மூவிஸ் தயாரித்துள்ளது. சீனாவில் தற்காப்பு கலையை அறிமுகம் செய்த போதி தர்மர் என்ற தமிழரை பற்றிய கதையே இப்படம்.

வேலாயுதம் படத்தில் விஜய்க்கு ஹன்சிகா, ஜெனிலியா என இரு ஜோடிகள் கிராமத்தில் பிறந்த சாதாரண இளைஞன் படிப்படியாக உயர்ந்து தலைவனாவதே கதை. ராஜா இயக்கியுள்ளார்.

மயக்கம் என்ன படத்தில் தனுஷ் ஜோடி ரிச்சா. செல்வராகவன் இயக்கியுள்ளார். இது அடுத்த தலைமுறை கதை என்று சுருக்கமாக சொல்கிறார் செல்வராகவன். ஏற்கெனவே தனுஷுக்காக செல்வராகவன் உருவாக்கிய டாக்டர்ஸ் என்ற படம்தான் இது என்கிறார்கள்.

இவற்றைத் தவிர, மேலும் சில படங்களும் கடைசி நேரத்தில் வெளியாகும் வாய்ப்புள்ளது.