ஹஸாரேவுக்காக முதல்வர் மகாத்மா படம் சிறப்புக் காட்சி!

By Shankar

| Published: Saturday, September 10, 2011, 18:02 [IST]

அ பாலகிருஷ்ணன் இயக்கியுள்ள முதல்வர் மகாத்மா படத்தை, அன்னா ஹஸாரேவுக்காக புனே நகரில் திரையிட்டுக் காட்டுகிறார்கள்.

மகாத்மா காந்தி இருந்திருந்தால், இன்றைய அரசியல் சூழ்நிலை எப்படியிருக்கும் மற்றும் ஊழல் பிரச்சினைகளை எப்படி எதிர்கொள்வார் என்ற கதையம்சத்துடன் உருவாக்கப்பட்டுள்ள படம் முதல்வர் மகாத்மா.

காமராஜர் படத்தை இயக்கிய அ பாலகிருஷ்ணன் இந்தப் படத்தை இயக்கியுள்ளார். இசைஞானி இளையராஜா இசையமைத்துள்ளார்.

இதில் காந்தி வேடத்தில் கனகராஜ் நடிக்க இன்னொரு முக்கிய வேடத்தில் அனுபம்கெர் நடித்துள்ளார்.

இந்தியிலும் இப்படம் உருவாகி உள்ளது. காந்தி படம் பற்றி கேள்விப்பட்ட அன்னா ஹசாரே, இயக்குனர் பாலகிருஷ்ணனை அழைத்து பேசினாராம். தனது போராட்டத்தை பிரதிபலிப்பது போல் கதை அமைந்துள்ளதால் அந்த படத்தை திரையில் பார்க்க விருப்பம் தெரிவித்துள்ளார் ஹஸாரே.

இதையடுத்து புனே நகரில் பிரத்யேகமாக இப்படத்தை திரையிட்டு காட்ட ஏற்பாடு நடக்கிறது.