என்ன நடக்குமோ...7 பெண்களின் உயிர்ப் பலி... பதற வைக்கும் “ஏழாம் உயிர்”!

பரபரக்கும் திரைக்கதை:

தொடக்கமாக ஒலிக்கும் பாடலும், அதில் காட்சியாக விரியும் அந்த 7 சிலைகளுமே நம்மை விறுவிறுப்பின் உச்சிக்கு கொண்டு செல்கின்றன. மர்மத்தின் முடிச்சு துளிக் கூட அவிழாத வகையில் அருமையாக திரைக்கதையை வடிவமைத்துள்ளார் இதன் இயக்குனர் அழகர்.

சுற்றிச் சுழலும் மர்மங்கள்:

வெளிநாட்டில் இருந்து சிலைகள் பற்றிய ஆராய்ச்சிக்காக வருகிறார் கதாநாயகி ப்ரியதர்ஷினி. அவருக்கு உதவும் அவருடைய தோழர் விக்கி. சாதாரணமாக சிலைகளைப் பற்றி ஆராய்ச்சி செய்ய முயலும் ப்ரியாவினைச் சுற்றி, அசாதாரணமான செயல்கள் நடக்க ஆரம்பிக்கின்றன.

கையில் கிடைக்கும் சிலை:

அவருக்கு உதவும் வகையில் எதிர்பாராமல் ஒரு வித்தியாசமான சிலையும் அவரது கைக்கு கிடைக்கின்றது. அதனைத் தொடரும் கிளைச் சம்பவங்களாக தொடர்ச்சியாக அமாவாசைகள் அன்று 4 பெண்களின் மரணங்கள். அதற்கு காரணம் ஒரு சடாமுடி மனிதரும், மந்த்ரா என்கின்ற அமானுஷ்ய பெண்ணும்தான்.

7 பெண்களின் உயிர்:

மந்த்ராவை ஒவ்வொரு பலியின் முடிவிலும் ப்ரியா கண்டறிந்து கொள்கிறாள். இந்த நிலையில் அந்த பலியாகும் பெண்கள் வரிசையில் ப்ரியாவும்
இருப்பது அவருக்கு தெரிய வருகின்றது. தன்னுடைய பிறந்தநாளையும், சிலை குறித்த மர்மங்களையும் அறிந்து கொள்ள விழைகிறாள்.

மிஞ்சுவது 3 மரணங்கள்தான்:

கடைசியாக தற்போது மிஞ்சி இருப்பது மூன்றே மரணங்கள். அதில் தன்னையும் காத்துக் கொண்டு, அந்த 2 பெண்களையும் ப்ரியா காப்பாற்றுவாளா என்று ரசிகர்களை எதிர்பார்ப்பில் தள்ளியுள்ளது இந்த சீரியல்.

மெனக்கெடல்கள் அதிகம்:

சீரியலில் தொடக்கத்தில் வருகின்ற மந்திர உச்சாடனம், வித்தியாசமான வடிவமுடைய 7 சிலைகள், மர்ம சடாமுடி மனிதர், காபாலிகர்கள், கனியான்கள், அகோரிகள், அந்த வித்தியாசமான சிலை, பின்னணி இசை, இடங்கள், நிகழ்வுகள் என ஒவ்வொரு விஷயத்திற்கும் மெனக்கெட்டுள்ளனர் குழுவினர்.

சூசன் அபாரம்:

மந்த்ராவாக நடிக்கும் சூசனும், ப்ரியாவாக நடிக்கும் லஷ்மியும் தங்களது நடிப்பினை அருமையாக வெளிப்படுத்தி வருகின்றனர். அனைத்து நடிகர்களுமே அவர்களுடைய கதாப்பாத்திரத்தினை செவ்வனே செய்துள்ளனர்.

வெயிட் பண்ணுங்க பாஸ்:

கிட்டதட்ட இறுதிக் கட்டத்தினை நெருங்கிக் கொண்டிருக்கும் இந்த சீரியலில் தற்போது ஒவ்வொரு மர்ம முடிச்சாக அவிழ ஆரம்பித்துள்ளது. அந்த சடாமுடி மனிதர் யார், எதற்காக 7 பெண்களை பலி கொடுக்கின்றார், ப்ரியாவிற்கும் இதற்கும் என்ன சம்பந்தம், அந்த சிலையின் பின்னணி, இந்த பலிகளின் பின்னணி இதையெல்லாம் தெரிந்து கொள்ள இன்னும் கொஞ்ச நாட்கள் நீங்கள் சோபா நுனியில் அமர்ந்தே ஆகவேண்டும் வேறு வழியே இல்லை!