பிக் பாஸ் ‘காதல்’ சென்டிமென்ட்.. ஜூலியை பின்பற்றும் இசைவாணி.. மதம் கடந்து நடக்கும் திருமணம்!

சென்னை: கானா இசைத்துறையில், தனது கணீர் குரலால் புதிய புரட்சியை ஏற்படுத்தியவர் பாடகி இசைவாணி. இயக்குநர் பா.இரஞ்சித்தின் இசைக்குழு மூலம் அறிமுகமாகி, பின்னர் 'பிக் பாஸ்' நிகழ்ச்சி மூலம் தமிழகத்தின் பட்டிதொட்டியெங்கும் பிரபலமான இசைவாணி, தற்போது தனது காதலரை கரம் பிடிப்பதன் மூலம் ஒரு புதிய வாழ்க்கைப் பயணத்தைத் தொடங்கியுள்ளார்.

காதல் திருமணம்: கானா பாடகி இசைவாணி தனது காதலருடன் இருக்கும் புகைப்படத்தைப் பகிர்ந்து, ரசிகர்களுக்கு சர்ப்ரைஸ் கொடுத்திருந்தார். இந்நிலையில், தனது இன்ஸ்டாகிராம் பக்கத்தில் தனது வருங்கால கணவரின் பெயரை 'அப்துல் மொய்தீன்' என்று அதிகாரப்பூர்வமாகப் பதிவிட்டுள்ளார். இதன் மூலம் இசைவாணி ஒரு இஸ்லாமிய இளைஞரைக் காதலித்து, மதம் கடந்து திருமணம் செய்து கொள்ளப் போகிறார் என்பது தெரியவந்துள்ளது. இவர்களது திருமண வரவேற்பு நிகழ்ச்சி இன்று (ஜூன் 7, 2026) சென்னை ராயபுரத்தில் உள்ள ரம்ஜான் மாலில் கோலாகலமாக நடைபெற உள்ளது.

புரட்சிப் பெண்: சிறுவயதிலிருந்தே இசையின் மீது தீராக் காதல் கொண்ட இசைவாணி, எளிய மக்களின் வாழ்வியலையும் சமூக அக்கறையுள்ள கருத்துகளையும் தனது கானா பாடல்கள் மூலம் பாடி தனக்கென தனி அடையாளத்தை உருவாக்கிக் கொண்டவர். இயக்குநர் பா.இரஞ்சித் உருவாக்கிய 'தி காஸ்ட்லெஸ் கலெக்டிவ்' (The Casteless Collective) இசைக்குழுவில் இணைந்து, மேடைகளில் இவர் காட்டிய அதிரடி பெர்ஃபாமன்ஸ் பலரையும் வியக்க வைத்தது.

பிக் பாஸ் : விஜய் டிவியின் 'பிக் பாஸ் சீசன் 5' நிகழ்ச்சியில் போட்டியாளராகப் பங்கேற்ற இசைவாணி, தனது எதார்த்தமான குணத்தால் மக்களின் மனங்களை வென்றார். சமூகவலைத்தளங்களில் இவருக்கு வாழ்த்துகள் குவிந்து வரும் நிலையில், ராயபுரத்தில் நடக்கும் இவர்களது திருமண வரவேற்பு விழாவில் திரையுலகினரும், இசைத்துறையினரும், பிக் பாஸ் பிரபலங்களும் கலந்துகொண்டு மணமக்களை வாழ்த்த உள்ளனர்.

பிக் பாஸ் காதல்' சென்டிமென்ட்: ஏற்கனவே விஜய் டிவியின் பிக் பாஸ் முதல் சீசன் மூலம் பிரபலமான ஜூலி கடந்த சில மாதங்களுக்கு முன்பு முகமது இக்ரீம் என்ற இஸ்லாமிய இளைஞரைக் காதலித்து திருமணம் செய்து கொண்டார். அந்தத் திருமணம் இணையத்தில் பெரும் பேசுபொருளாக மாறியது. தற்போது அதே பிக் பாஸ் வீட்டிற்குள் சென்று வந்த மற்றொரு பிரபல பாடகியான இசைவாணியும் ஒரு இஸ்லாமிய இளைஞரைத் தனது வாழ்க்கைத்துணையாகத் தேர்ந்தெடுத்துள்ளார். இதன் மூலம் பிக் பாஸ் பிரபலங்களின் மதம் கடந்த காதல் திருமணங்களின் பட்டியல் ரசிகர்களிடையே மீண்டும் ஒரு சுவாரசியமான விவாதத்தை ஏற்படுத்தியுள்ளது.