ஒரே வார்த்தை.. சாண்டியை கதறி அழ வைத்த மாமியார்.. அப்டியே வனிதாவையும் கொஞ்சம் கவனிங்களேன் பிக் பாஸ்

வனிதாவின் எதிர்பார்ப்பு

ஏற்கனவே கடந்த வாரம் முழுவதும் சாந்தசொரூபியாக வலம் வந்த வனிதா, நேற்றும் தன் மகனை எதிர்பார்த்ததாகக் கூறி அழுதது பார்க்க பாவமாக இருந்தது. கமல் கூறியது போல், அவரது சண்டைக்கோழி குணத்தை எல்லாம் தாண்டி, இக்காட்சிகள் அவரது தாய்மையையும், ஏக்கத்தையும் வெளிக்காட்டுவதாக இருந்தது.

சாண்டியின் மச்சினிச்சி

இதேபோல், சாண்டி பேசுகையில் கிண்டலாக மச்சினிச்சி வந்திருந்தா நல்லாயிருக்கும் சார் என சிரித்துக் கொண்டே கூறினார். சாண்டி விளையாட்டுக்குத் தான் கூறுகிறார் என நினைத்தால், நிஜமாகவே இன்று அவரது மச்சினிச்சியையும் மேடையேற்றி விட்டார் பிக் பாஸ். கூடவே மாமியாரும்.

சாண்டியின் மாமியார்

சாண்டி பற்றி கமல் முன்னிலையில் பேசிய அவரது மாமியார், ‘இதுவரை சாண்டியை மாப்பிள்ளை என்றே அழைத்ததில்லை. அவரும் தனக்கு ஒரு மகன் தான்' என நெகிழ்ச்சியாகக் கூறினார். கூடவே ‘ஜெயிச்சுட்டு வாங்க மாப்பிள்ள' என்றார் அவர். இதனை அகம் டிவி வழியே பார்த்த சாண்டி கண்ணீர் விட்டு அழுதார்.

மற்றவர்களின் ஆசை

இன்றைய புரொமோவில் வெளியாகி இருக்கும் இந்த வீடியோவைப் பார்க்கும் போது, நேற்று மற்ற போட்டியாளர்கள் கூறியது போல் அவர்களது ஆசையையும் பிக் பாஸ் நிறைவேற்றுவாரா என்ற எதிர்பார்ப்பு எழுந்துள்ளது. அதிலும் குறிப்பாக வனிதாவின் ஆசையை நிறைவேற்றுவாரா என்பது தான் பலரது ஆர்வமாக உள்ளது.

கண்டெண்ட் குயின் வனிதா

இதுவரை தன் பெயரைக் கெடுத்துக் கொண்டாலும்கூட, பிக் பாஸ் எதிர்பார்த்ததைவிட அதிக கண்டெண்டுகளைக் கொடுத்து திணறடித்து விட்டார் வனிதா. எனவே, அவரை வீட்டை விட்டு வெளியேற்றும் முன், மகனை அழைத்து வந்து ஆசையை நிறைவேற்றி வையுங்கள் பிக் பாஸ் என நெட்டிசன்கள் கூறி வருகின்றனர்.