இஸ்லாமிய பெண்ணின் வாழ்க்கையை சொல்லும் ஜமீலா.. மிரட்டலான ப்ரமோவை வெளியிட்ட சேனல்!

சேனல்களுக்குள் போட்டி

தமிழில் டிஆர்பியை அதிகரிக்கும் முயற்சியில் ஒவ்வொரு சேனலும் சிறப்பான நிகழ்ச்சிகள், தொடர்களை தொடர்ந்து திட்டமிட்டு ஒளிபரப்பி வருகின்றன. அந்த வகையில் விஜய் டிவி, சன் டிவிக்கு இடையில் அதிக போட்டி நிலவி வருகின்றன. குறிப்பாக விஜய் டிவியின் சீரியல்களில் பாக்கியலட்சுமி, பாரதி கண்ணம்மா, பாண்டியன் ஸ்டோர்ஸ் மற்றும் சன் டிவியின் கயல், ரோஜா உள்ளிட்ட தொடர்கள் இந்தப் போட்டியில் உள்ளன.

புதிய தொடர் ஜமீலா

அந்த வகையில் கலர்ஸ் தமிழும் சிறப்பான பல தொடர்களை ஒளிபரப்பி வருகின்றன. இந்நிலையில் இஸ்லாமிய பெண்ணின் வாழ்க்கையை கூறும் ஜமீலா என்ற புதிய தொடரை வரும் அக்டோபர் 10ம் தேதி முதல் ஒளிபரப்ப உள்ளது இந்த சேனல். இதையொட்டி தற்போது இந்த தொடரின் புதிய ப்ரமோவையும் வெளியிட்டுள்ளது.

புதிய ப்ரமோ வெளியீடு

தனது திறமையை கண்டறிந்து கனவுகளை நிஜமாகக்கும் இஸ்லாமிய பெண்ணின் ஆத்மார்த்தமான பயணத்தை இந்த தொடர் கதைக்களமாக கொண்டுள்ளது. இந்தத் தொடரில் பிரபல நடிகை தன்வி ராவ் லீட் கதாபாத்திரத்தில் நடித்துள்ளார். இந்த முதல் ப்ரமோ ரசிகர்களை வெகுவாக கவரும் வகையில் அமைந்துள்ளது.

ஜமீலா சொல்ல வருவது என்ன?

இருட்டான ஆடிட்டோரியத்தின் பின்னணியில் எடுக்கப்பட்ட இந்த ப்ரமோவில் முழுமையான பர்தாவை அணிந்த ஒரு பெண் மேடையில் தோன்றி பார்வையாளர்களின் ஆரவாரத்திற்கு இடையில் தன்னுடைய முகத்திரையை விலக்கி, மைக்கை பிடிக்கும்வகையில் இந்த ப்ரமோ அமைந்துள்ளது. அவள் என்ன சொல்ல விரும்புகிறாள் என்பதை அமையாக வைத்து இந்த ப்ரமோ வெளியாகியுள்ளது.

பிரபல நடிகை தன்வி ராவ்

ரங்பிரங்கி, கன்ஸ் ஆப் பனாரஸ், குலாப் கேங் போன்ற திரைப்படங்களில் நடித்துள்ளவர் தன்வி ராவ். அவர் இந்தக் கேரக்டரில் லீட் கதாபாத்திரத்தில் நடித்துள்ளார். இஸ்லாமிய பெண்களுக்கு எப்போதுமே அவர்களது கனவுகளை பெறுவதற்கு கட்டுப்பாடுகள் அதிகமாக இருக்கும் என்பதையும் இந்த தொடரின் கதைக்களம் சிறப்பாக விளக்க உள்ளது.