முடிவுக்கு வரும் விஜய் டிவியின் ஹிட் சீரியல்.. ஏன் என்னாச்சு.. ரசிகர்கள் ஆதங்கம்!

விஜய் டிவி நிகழ்ச்சிகள்

விஜய் டிவியின் பிக்பாஸ், குக் வித் கோமாளி, பிக் பாஸ் ஜோடிகள், சூப்பர் சிங்கர் என அடுத்தடுத்த நிகழ்ச்சிகள் ரசிகர்களை வெகுவாக கவர்ந்து வருகின்றன. முக்கியமாக பிக் பாஸ் விரைவில் தனது 6வது சீசனை ஒளிபரப்பவுள்ளது. இதேபோல குக் வித் கோமாளி நிகழ்ச்சி 3 சீசன்களை நிறைவு செய்துள்ளது.

வரவேற்பை பெறும் சீரியல்கள்

இதனிடையே நிகழ்ச்சிகளை போலவே விஜய் டிவியின் சீரியல்களும் ரசிகர்களின் பேவரிட்டாகத்தான் உள்ளன. இந்த சீரியல்களுக்காக தங்களது வேலைகளை விட்டுவிட்டு பார்க்கும் ரசிகர்களும் இருக்கத்தான் செய்கின்றனர். இதுபோல ரசிகர்களை அதிகமாக கவர்ந்த சீரியல்களின் இரண்டாவது, மூன்றாவது சீசன்களையும் விஜய் டிவி ஒளிபரப்பி ரசிகர்களை கவர்ந்து வருகிறது.

பாவம் கணேசன் தொடர்

அந்த வகையில் விஜய் டிவியின் முக்கியமான தொடராக ரசிகர்களை கவர்ந்து வருகிறது பாவம் கணேசன். கடந்த 2020ல் கொரோனா லாக்டவுனுக்கு பிறகு ஒளிபரப்பாகத் தொடங்கிய இந்தத் தொடர் ஏராளமான ரசிகர்களை கவர்ந்துள்ளது. தன்னுடைய சொந்த மகிழ்ச்சி உள்ளிட்டவற்றை துறந்து குடும்பத்திற்காக வாழும் இளைஞனைப் பற்றிய கதைக்களத்தை இந்த தொடர் கொண்டுள்ளது.

குடும்பத்திற்காக போராடும் கணேசன்

இந்தத் தொடரில் கணேசன் என்ற கேரக்டரில், கலக்கப் போவது யாரு நிகழ்ச்சி மூலம் பிரபலமான நவீன் ஹீரோவாக நடித்து வருகிறார். நாயகியாக குணா என்ற கேரக்டரில் நேகா கவுடா நடித்து வருகிறார். தந்தை இல்லாத தன்னுடைய குடும்பத்தை காப்பாற்றுவதற்காக வாட்டர் கேன் போடுவது உள்ளிட்ட அனைத்து வேலைகளையும் செய்கிறார் கணேசன்.

விறுவிறுப்பான எபிசோட்கள்

அம்மா, ஒரு தம்பி, 2 தங்கை, ஒரு அக்கா என பெரிய குடும்பத்தை காப்பாற்றும் பொறுப்பை ஏற்று அதற்காக சிரமப்படுகிறார் கணேசன். இந்நிலையில் தற்போது குணாவின் தம்பி, கணேசனின் கடைசி தங்கையின் கழுத்தில் தாலி கட்டுகிறார். இதை ஏற்றுக் கொள்ளத்தான் வேண்டும் என்று கணேசனின் அம்மா கூறிவிடுகிறார்.

விரைவில் நிறைவு?

இவ்வாறு விறுவிறுப்பாக சென்றுக் கொண்டிருக்கும் இந்தத் தொடர் கூடிய விரைவில் நிறைவுக்கு வரவுள்ளதாக தகவல்கள் வெளியாகி வருகின்றன. இந்த தொடருக்கு பதிலாக கோகுலத்தில் சீதை தொடர் புகழ் நந்தா மாஸ்டர் நடிக்கும் கண்ணே கலைமானே என்ற புதிய தொடர் களத்தில் இறங்கவுள்ளதாம்.

ரசிகர்கள் வருத்தம்

பாவம் கணேசன் தொடரில் அப்பா இல்லாத பெரிய குடும்பத்தை காப்பாற்றிவரும் கணேசன், உண்மையில் மிகவும் பாவமாகவே காணப்படுகிறார். அவரது சவால்களும் ரசிகர்களுக்கு அந்த கேரக்டர் மீதான ஈர்ப்பை அதிகப்படுத்தி வருகிறது. இந்நிலையில் இந்தத் தொடர் விரைவில் நிறைவடையவுள்ளதாக கூறப்படும் தகவல் ரசிகர்களை வருத்தம் கொள்ள செய்துள்ளது.