2025-ல் பாக்ஸ் ஆபிஸ் ராஜா யார்? முதல் நாளில் அதிக வசூல் செய்த டாப் 5 தமிழ் படங்கள்

2025-ன் பாக்ஸ் ஆபிஸ் ராஜாவாக விளங்கிய படம் குட் பேட் அக்லி. அஜித் குமார் நாயகனாக நடித்த இந்தப் படத்தை அவரது ரசிகரும் இயக்குநருமான ஆதிக் ரவிச்சந்திரன் இயக்கினார். மசாலா காட்சிகள், பிற படங்களின் குறிப்புகள் என ரசிகர்களை கவர்ந்த இந்தப் படம், ஏப்ரல் 10 அன்று வெளியானது.

முதல் நாளில் 28 கோடி ரூபாய் வசூலித்த இந்தப் படம், மொத்தமாக 246 கோடி ரூபாய்க்கு மேல் வசூலித்து மாபெரும் வெற்றியைப் பதிவு செய்தது.

அஜித் குமார் மற்றும் மகிழ் திருமேனி இணைந்து உருவாக்கிய படம் விடாமுயற்சி. இதில் அஜித்துக்கு ஜோடியாக த்ரிஷா நடித்திருந்தார். படப்பிடிப்பு தாமதம், வெளியீடு தாமதம் என பல தடைகளைத் தாண்டி இந்தப் படம் 2025 பிப்ரவரி 6 அன்று வெளியானது.

ஆனால், ரசிகர்களின் எதிர்பார்ப்பை இந்தப் படம் முழுமையாக பூர்த்தி செய்யவில்லை. இருப்பினும், முதல் நாளில் 25.5 கோடி ரூபாய் வசூலித்தது. மொத்தமாக 100 கோடி ரூபாய் வசூல் செய்திருந்தாலும், இந்தப் படம் பாக்ஸ் ஆபிஸில் தோல்வியடைந்ததாக கூறப்படுகிறது.

சூர்யாவின் முந்தைய படமான கங்குவா எதிர்பார்த்த வெற்றியைத் தரவில்லை. ஆனால், கார்த்திக் சுப்புராஜ் இயக்கத்தில் வெளியான ரெட்ரோ படம் அவருக்கு புது உத்வேகத்தை அளித்தது. இந்தப் படம் மக்களிடையே கலவையான விமர்சனங்களைப் பெற்றாலும், தமிழகத்தில் சூர்யாவுக்கு மிகப்பெரிய தொடக்கத்தை (ஓப்பனிங்) கொடுத்தது.

ரெட்ரோ முதல் நாளில் சுமார் 14 கோடி ரூபாய் வசூலித்து பாக்ஸ் ஆபிஸில் பரபரப்பை ஏற்படுத்தியது.

2025-ன் மிகப்பெரிய வெற்றிப் படங்களில் ஒன்று டிராகன். இளைஞர்களை கவர்ந்த இந்தப் படத்தில் பிரதீப் ரங்கநாதன் நாயகனாகவும், கயாடு லோஹர், அனுபமா பரமேஸ்வரன் ஆகியோர் நாயகிகளாகவும் நடித்திருந்தனர். அஷ்வத் மாரிமுத்து இயக்கிய இந்தப் படம், கல்லூரி மாணவனின் வாழ்க்கையை மையமாகக் கொண்டது. ஊதாரித்தனமாக இருந்த ஒரு இளைஞன், பின்னர் தனது தவறுகளை உணர்ந்து திருத்திக் கொள்வதே கதையின் சாரம்.

இந்தப் படம் இளைஞர்கள் மத்தியில் பெரும் வரவேற்பைப் பெற்றது. முதல் நாளில் 5.75 கோடி ரூபாய் வசூலித்த இந்தப் படம், மொத்தமாக 150 கோடி ரூபாய் வசூல் செய்து மாபெரும் வெற்றியடைந்தது.

“லேட்டா வந்தாலும் லேட்டஸ்டா வருவேன்” என்பதற்கு உதாரணமாக அமைந்த படம் மதகஜராஜா. விஷால் நாயகனாக நடித்த இந்தப் படம், சுந்தர்.சி இயக்கத்தில் 12 ஆண்டுகளுக்கு முன்பு உருவாக்கப்பட்டது. ஆனால், பணப் பிரச்னைகள் காரணமாக அப்போது வெளியாகவில்லை. இதில் சந்தானம், ஆர்யா, அஞ்சலி, வரலட்சுமி உள்ளிட்ட பலர் நடித்திருந்தனர்.

இந்தப் படம் 2025 ஜனவரி 12 அன்று வெளியானது. முதல் நாளில் சுமார் 3.20 கோடி ரூபாய் வசூலித்து அனைவரையும் ஆச்சரியப்படுத்தியது. மொத்தமாக உலகளவில் 63 கோடி ரூபாய் வசூல் செய்ததாக தகவல்கள் தெரிவிக்கின்றன.