Birthday Special: LCU நாயகன் லோகேஷ் கனகராஜ் பற்றி நீங்கள் அறியாத பல தகவல்கள்

லோகேஷ் கனகராஜ், மார்ச் 14, 1986 அன்று பரமேஸ்வரன் மற்றும் சுனிதா பரமேஸ்வரன் தம்பதியருக்கு மகனாகப் பிறந்தார். அவர் கோயம்புத்தூரில் உள்ள கிணத்துக்கடவைச் சேர்ந்தவர். இவருக்கு அரவிந்த் ஞானசம்பந்தம், அஸ்வின் வெங்கடேஷ், மற்றும் பிரசாந்த் ஞானசம்பந்தம் என மூன்று சகோதரர்கள் உள்ளனர். இவர் ஜனவரி 8, 2012 -யில் ஐஸ்வர்யா லோகேஷை திருமணம் செய்து கொண்டார். இவருக்கு ஆத்விகா லோகேஷ் மற்றும் ஆருத்ரா லோகேஷ் இரண்டு அழகான பெண் குழந்தைகள் உள்ளனர். 

பொள்ளாச்சி பழனியம்மாள் மெட்ரிக் உயர்நிலைப் பள்ளியில், தனது பள்ளிப் படிப்பை முடித்தார். பி.எஸ்.ஜி கலை மற்றும் அறிவியல் கல்லூரியில், MA பிசினஸ் அட்மினிஸ்டரேஷன் முதுகலைப் பட்டம் பெற்றார். படித்து முடித்தவுடன் ஒரு வங்கியில் வேலை செய்து கொண்டு இருந்த லோகேஷ் கனகராஜ், நாளைய இயக்குனர் என்னும் ரியாலிட்டி நிகழ்ச்சியில் போட்டியாளராக பங்கேற்று பிரபலமானார். 

இயக்குனர் கார்த்திக் சுப்பராஜ் தயாரித்த அவியல் என்னும் படத்தில் ஒரு சிறிய கதையை இயக்கி இயக்குனராக அவதரித்தார், லோகேஷ் கனகராஜ். அவியல் படத்திற்கு பின் மாநகரம் படத்தினை இயக்கி 2017ஆம் இயக்குனராக திரையுலகில் அறிமுகம் ஆனார். சிறு பட்ஜெட் படமாக வெளியான இத்திரைப்படம் பெரிய அளவில் விமர்சனம் ரீதியாக மக்களை கவர்ந்தது.பிறகு இவர் நடிகர் கார்த்தியை  நாயகனாக வைத்து கைதி என்னும் படத்தினை இயக்கினார். இப்படம் 2019 ஆம் ஆண்டு தீபாவளி பண்டிகை முன்னிட்டு வெளியாகி சூப்பர் ஹிட் ஆனது.

இயக்குனர் லோகேஷ் கனகராஜ் தமிழ் சினிமாவை ஹாலிவுட் சினிமா தரத்திற்கு உயர்த்தியுள்ளார். தனது ஒரு படத்திற்கும் மற்றொரு படத்திற்கும் சில ஒற்றுமைகளை திரைக்கதையில் வடிவமைத்து இயக்கி வருகிறார். கைதி படத்தின் தொடர்ச்சியாக விக்ரம் படம் என தனது அடுத்தடுத்த படங்களில் ஒவ்வொரு படத்தையும் இணைக்க, திட்டமிட்டுள்ளார், லோகேஷ் கனகராஜ். கைதி 2, ரோலக்ஸ், விக்ரம் 2 , கூலி எனும் படங்கள் இவர் இயக்கி அடுத்தடுத்து வெளியாக உள்ளன.