Siragadika Aasai: கவரிங் நகை விவகாரத்தில் சிக்கிய மனோஜ் & விஜயா... இந்த முறை அடி பலமோ!

சிறகடிக்க ஆசை - ஸ்டார் விஜய் தொலைக்காட்சியில் தற்போது ஒளிபரப்பாகும் பிரைம் சீரியல், சிறகடிக்க ஆசை. இந்த சீரியலின் கதைக்களம் மற்றும் சுவாரஸ்யம் ரசிகர்கள் மத்தியில் பெரிய அளவில் கொண்டாடப்படுகிறது. இந்த சீரியலின் முத்து, மீனா, விஜயா, ரோகினி, மனோஜ், அண்ணாமலை ஆகிய கதாபாத்திரங்கள் பெரும் வரவேற்பினை பெற்று பிரபலமாகியுள்ளது. வாரந்தோறும் இரவு 9 மணிக்கு ஒளிபரப்பாகும் இந்த சீரியல் நம்பர் 01 சீரியல் என்ற புகழினை தட்டி துக்கியுள்ளது.

மீனாவின் நகைகளை விஜயாவிடம் கொடுத்து வைத்திருந்த முத்து மற்றும் மீனா, வேற நகை வாங்கவேண்டும் என்று விஜயாவிடம் கேட்டபோது கவரிங் நகைகளை கொடுத்து சமாளித்தார். மனோஜ் தனது தொழிலில் ஏற்பட்ட நஷ்டத்தை சரிக்கட்ட மீனாவின் நகையை விற்று அதனை வைத்து சமாளித்துள்ளார். இது விவகாரம் பற்றிய உண்மையை கண்டறிய பல முயற்சிகள் செய்து தற்போது இந்த வார எபிசோடுகளில் முத்து உண்மையை கண்டறிகிறார்.

மனோஜ் வியாபாரம் செய்து வரும் கடையில் பொருட்கள் வாங்குவது போல நாடகமாடி 4 லட்ச ரூபாயை ஏமாற்றி தப்பி சென்றுள்ளனர் சில தந்திரக்காரர்கள். பின் அதனை சமாளிக்க மீனாவின் நகையை எடுத்து விற்று அந்த பணம் மூலம் அந்த நஷ்டத்தை  சரிசெய்துள்ளார், மனோஜ். இவரின் இந்த செயலுக்கு விஜயா உறுதுணையாக இருந்து தவறுக்கு துணை சென்றுள்ளார்.

மீனாவிற்கு நகைகள் தேவை என்ற சூழலில் தங்க நகைக்கு பதிலாக கவரிங் நகைகளை வாங்கி மாற்றியுள்ளார், மனோஜ் மற்றும் விஜயா.

தங்க நகை எப்படி மாறியது என்ற கேள்வி கேட்ட முத்துவை சமாளிக்க முடியாமல், மீனாவின் தாய் மற்றும் அண்ணாமலையின் தாய் இருவர் மீது பழி போட்டு சமாளித்து பலர் விரோதத்தை ஏற்றுள்ளார், விஜயா. இதனை நம்பாத முத்து உண்மையை கண்டறிய பல முயற்சிகள் செய்து வரும் நிலையில், இறுதியாக ஒரு எலுமிச்சை பழம் வாங்கி மாந்திரிக பழம் என பொய் சொல்லி வீட்டில் உள்ளவரை பயமுறுத்தி வருகிறார்.

முத்து வைத்திருக்கும் எலுமிச்சை பழத்தை எடுக்க, நடுஇரவில் மனோஜ் மற்றும் விஜயா முயற்சித்து முத்து வீசிய வலையில் அவர்களே விழுந்துள்ளனர். இதனை ரவி - சுருதி, மீனா - முத்து மற்றும் அண்ணாமலை ஆகியோர் இரவில் நோட்டமிட்டு கையும் களவுமாக விஜயா மற்றும் மனோஜ்-யை பிடித்துள்ளனர். இவர்களின் திருட்டு தனத்தை பொறுக்க முடியாமல் அண்ணாமலை மனோஜ்-யை சரமாரியாக தாக்குகிறார்.