துருவ நட்சத்திரம் முதல் சர்வர் சுந்தரம்: திரையில் வெளியாக தவிக்கும் இந்த 8 தமிழ் படங்களுக்கு என்ன பிரச்சனை

துருவ நட்சத்திரம் - இயக்குனர் கவுதம் மேனன் தானே இயக்கி தயாரித்துள்ள அதிரடி - திரில்லர் திரைப்படம். இப்படத்தில் விக்ரம், ஐஸ்வர்யா ராஜேஷ், ரித்து வர்மா, ராதிகா சரத்குமார், மாயா கிருஷ்ணன் என பல பிரபலங்கள் நடித்துள்ளனர். இப்படம் தொடங்கப்பட்டு சில நாட்களில் இருந்து இப்படத்தின் தயாரித்த கவுதம் மேனனுக்கு ஏற்பட்ட கடன் நெருக்கடி காரணத்தால் இப்படம் பல இடங்களில் தடுமாற்றத்தை சந்தித்தது.

இறுதியில் இப்படத்தினை முற்றிலுமாக முடித்த கவுதம் மேனன், வெளியிட்டு நேரத்தில் பல இடங்களில் இருந்து கடன் நெருக்கடி சந்திக்கிறார். இதனால் பலமுறை இப்படத்தின் வெளியிட்டு தேதி அறிவித்து பின் இப்படடம் ரிலீஸ் செய்யாமல் தள்ளி வைக்கப்பட்டுள்ளது. இறுதியில் பல போராட்டங்களுக்கு பின் இப்படம் 2023, நவம்பர் மாதம் உறுதியாக வெளியாகும் என படக்குழு சார்பில் அதிகாரப்பூர்வ அறிவிப்புடன் பல ப்ரோமோஷன் பணிகள் தொடங்கப்பட்டது. 

தற்போதும் சில காரணத்தால் இப்படம் வெளியாகாமல் வெளியீட்டிற்கு தள்ளிச்சென்றுள்ளது.

சர்வர் சுந்தரம் - இயக்குனர் ஆனந்த் பல்கி இயக்கத்தில் சந்தானம், வைபவி, சினேகன், ராதா ரவி என பல பிரபலங்கள் நடித்திருக்கும் நகைச்சுவை திரைப்படம். இப்படம் சமையல் கலை மற்றும் அதன் பின்னணி நிகழ்வுகளை அடிப்படையாக கொண்டு உருவாக்கப்பட்டுள்ளது. 

இப்படம் பல ஆண்டுகளுக்கு முன் முடிக்கப்பட்டு வெளியீட்டிற்கு வந்த நிலையில், இப்படத்தின் தயாரிப்பாளருக்கு ஏற்பட்ட கடன் நெருக்கடி காரணத்தால் இப்படம் வெளியாகாமல் தள்ளி சென்றுள்ளது. பலமுறை இப்படம் புதிதாக வெளியிட்டு தேதிகள் அறிவித்து வெளியாகும் என ரசிகர்கள் மத்தியில் எதிர்பார்ப்பை கிளைப்பி இறுதியில் சர்வர் சுந்தரம் திரைப்படம் வெளியாகாமல் ரசிகர்களை ஏமாற்றி வருகிறது.

அந்தகண் - தமிழ் திரையுலகில் மூத்த நடிகரான தியாகராஜன் இயக்கத்தில் அவரின் மகன் பிரஷாந்த் தியாகராஜன் நடிக்கும் திரில்லர் திரைப்படம். இப்படத்தில் சிம்ரன், பிரியா ஆனந்த் என பல பிரபலங்கள் நடித்துள்ளனர். 2018 ஆம் ஆண்டு ஹிந்தி சினிமாவில் வெளியான அந்ததூன் படத்தின் தமிழ் ரீமேக் திரைப்படமாகும், அந்தகண். 

2019 ஆம் ஆண்டு அதிகாரப்பூர்வ அறிவிப்புடன் படப்பிடிப்பை தொடங்கிய இந்த படத்தின் குழு, இன்னும் இப்படம் பற்றிய எந்த தகவல்களும் வெளியாகாமல் உள்ளது. இப்படத்தினை நிறுத்திவிட்டார்களா இல்லை இப்படத்திற்கு ஏதேனும் பிரச்சனையா என ரசிகர்கள் மத்தியில் பல குழப்பங்கள் எழுந்துள்ளது. 

இடம் பொருள் ஏவல் - இயக்குனர் சீனு ராமசாமி இயக்கத்தில் விஜய் சேதுபதி, விஷ்ணு விஷால் முன்னணி கதாபாத்திரத்தில் நடித்திருக்கும் திரைப்படம். சில காரணங்களால் இப்படம் வெளியீட்டிற்கு தள்ளி சென்றதை தொடர்ந்து, பல முறை இப்படத்தினை வெளியிட பல முயற்சிகள் எடுக்கப்பட்டுள்ளது. இருப்பினும் இப்படம் இன்னும் வெளியாகாமல் உள்ளது. எதற்காக இப்படம் வெளியாகாமல் இருக்கிறது என்பதற்கான அதிகாரப்பூர்வ அறிவிப்பும் மற்றும் தகவல்களும் இன்னும் படக்குழு சார்பில் வெளியாகவில்லை.

பாரிஸ் பாரிஸ் - இயக்குனர் ரமேஷ் அரவிந்த் இயக்கத்தில் காஜல் அகர்வால் முன்னணி கதாபாத்திரத்தில் நடித்திருக்கும் திரைப்படம். இப்படம் 2014 ஆம் ஆண்டு வெளியான 'குயின்' என்ற ஹிந்தி திரைப்படத்தின் தமிழ் ரீமேக் படமாகும். இப்படத்தின் டிரைலர் வெளியாகி பல ரசிகர்கள் மத்தியில் ட்ரெண்டிங் ஆன நிலையில், இப்படம் குறித்து எந்த அறிவிப்பும் பின்னர் வெளியாகவில்லை.

நரகாசூரன் - இயக்குனர் கார்த்திக் நரேன் இயக்கத்தில் அரவிந்த் சாமி, சுதீப் கிஷான், ஆத்மீகா என பலர் முன்னணி கதாபாத்திரத்தில் நடித்திருக்கும் திரில்லர் திரைப்படம். 'துருவங்கள் 16' படத்தினை இயக்கிய வெற்றி இயக்குனராக இப்படத்தினை இயக்கியுள்ளார், கார்த்திக் நரேன். இப்படம் தொடங்கிய ஆரம்ப காலத்தில் ரசிகர்கள் மத்தியில் பெரும் எதிர்பார்ப்புகள் இருந்துள்ள நிலையில், பின் இப்படம் சில பிரச்சனைகளில் சிக்கி வெளியாகாமல் இருக்க ரசிகர்களுக்கு இப்படத்தின் மேல் உள்ள எதிர்பார்ப்புகள் குறைந்திருக்கிறது.

இப்படம் சமீபத்தில் ஓடிடி தளத்தில் நேரடியாக வெளியாகிறது என்ற தகவல்கள் வெளியான நிலையில், பின் அதுவும் படக்குழு சார்பில் இறுதியில் மறுக்கப்பட்டது. இப்படம் இனி எப்போது வெளியாகவும் என்ற தெரியவில்லை. இப்படத்தின் தாமதம் குறித்த காரணங்களும் இன்னும் வெளியாகாமல் உள்ளன.

பார்ட்டி - இயக்குனர் வெங்கட் பிரபு இயக்கத்தில் ஜெய், சிவா, சத்யா ராஜ், நிவேதா பெத்துராஜ் என பலர் நடித்திருக்கும் திரைப்படம். இப்படத்தினை தயாரிப்பாளர் டி சிவா தயாரித்துள்ளார். இப்படம் உருவாகி படப்பிடிப்பு முடிக்கப்பட்ட நிலையில், ஏதோ சில பிரச்சனைகள் ஆரம்பமாகியுள்ளது. இறுதியில் இப்படத்தினை வெளியிடாமல் நிறுத்தி வைத்துள்ளனர், படக்குழுவினர்.

இப்படத்திற்கு பின், இயக்குனர் வெங்கட் பிரபு இயக்கத்தில் மாநாடு படம் வெளியாகி தற்போது தளபதி விஜய் நடிக்கும் 'தளபதி 68' திரைப்படம் உருவாகி வருகிறது.

டைட்டானிக் (காதலும் கவுந்து போகும்) - இயக்குனர் ஜானகிராமன் இயக்கத்தில் தயாரிப்பாளர் சி வி குமார் தயாரிப்பில் கலையரசன், ஆனந்தி, ஆஷ்னா என பல பிரபலங்கள் நடிப்பில் உருவாகியுள்ள நகைச்சுவை - காதல் திரைப்படம். இப்படத்தின் அறிவிப்புகள் மற்றும் டிரைலர் வெளியாகி ரசிகர்கள் மத்தியில் நல்ல வரவேற்பினை பெற்றது. இருப்பினும் இப்படம் சில காரணங்களால் வெளியாகாமல் தள்ளிச்சென்றுள்ளது. இப்படத்தின் தயாரிப்பாளர் இயக்கிய படங்களும் அடுத்தடுத்து வெளியான நிலையில், இப்படம் மட்டும் ஏன் வெளியாகாமல் நிறுத்தி வைக்கப்பட்டுள்ளது என்று பலருக்கு குழப்பமாக உளள்து. இப்படத்தின் ரிலீஸ் குறித்து படக்குழு சார்பில் எந்த ஒரு தகவல்களும் வெளியாகவில்லை.