பலமான கூட்டணியுடன் உருவாகும் நடிகர் கார்த்தி நடிக்கும் புதிய படங்கள்

வா வாத்தியார் - இயக்குனர் நலன் குமாரசாமி இயக்கத்தில் கார்த்தி, க்ரித்தி ஷெட்டி, சத்யராஜ், ராஜ்கிரண், ஆனந்த் ராஜ் என பல முன்னணி தமிழ் பிரபலங்கள் முக்கிய கதாபாத்திரத்தில் நடித்திருக்கும் திரைப்படம். இப்படத்திற்கு இசையமைப்பாளர் சந்தோஷ் நாராயணன் இசையமைத்துள்ளார்.

சூது கவ்வும், காதலும் கடந்து போகும் என பல வெற்றி படங்களை இயக்கி மக்கள் மத்தியில் பிரபலமானவர், நலன் குமாரசாமி. இவரது இயக்கத்தில் நடிகர் கார்த்தி நாயகனாக நடிக்க - நகைச்சுவை, காதல் மற்றும் சமூக அக்கறையோடு இப்படம் உருவாகி வருகிறது. இவர்களின் இந்த கூட்டணிக்கு ரசிகர்கள் பெரிய அளவு எதிர்பார்ப்பில் உள்ளனர்.

மெய்யழகன் - இயக்குனர் பிரேம் குமார் இயக்கத்தில் கார்த்தி நாயகனாக நடிக்கும் திரைப்படம். இப்படத்தினை நடிகர் சூர்யா தனது '2 டி என்டர்டைன்மெண்ட்' நிறுவனத்தின் மூலம் தயாரிக்க, இசையமைப்பாளர் கோவிந்த வசந்தா இசையமைத்துள்ளார்.

பிரேம் குமார் தமிழ் சினிமாவில் '96 படத்தினை இயக்கி பலர் மத்தியில் கொண்டாடப்பட்டு பிரபலமானவர். விஜய் சேதுபதி - திரிஷா நடிப்பில் உருவாகியுள்ள இப்படம் தமிழில் மிகப்பெரிய ஹிட் அடித்த திரைப்படம். காதல் கதையாக உருவாகி பலரின் மனதை வென்ற 96 பட இயக்குனர், இப்படத்தின் வெற்றிக்கு பின் பல ஆண்டுகள் காத்திருந்து தற்போது மீண்டும் ஒரு நல்ல கதையை வைத்து நடிகர் கார்த்தி உடன் கூட்டணி அமைத்துள்ளார். தொடர்ந்து அதிரடி கதைக்களத்தில் நடித்து வரும் கார்த்தி, இப்படி ஒரு காதல் பட இயக்குனருடன் கூட்டணி அமைத்துள்ளது, கோலிவுட் வட்டாரங்களில் அதிகம் பேசப்படுகிறது.

லோகேஷ் கனகராஜ் - கார்த்தி கூட்டணியில் 2019ஆம் ஆண்டு தீபாவளி பண்டிகைக்கு வெளியாகி பெரிய அளவில் ஹிட் அடித்த திரைப்படம், கைதி. இப்படத்தினை தமிழ் பட தயாரிப்பாளர் எஸ் ஆர் பிரபு 19 கோடி பொருட்செலவில் தயாரித்து, 100 கோடிகளுக்கு மேல் வசூல் அள்ளியுள்ளது. இப்படத்தின் பிரமாண்ட வெற்றியை தொடர்ந்து கைதி படத்தின் இரண்டாம் பாகத்தின் அறிவிப்புகள் அதிகாரப்பூர்வமாக வெளியானது. கைதி 2 படம் இந்த வருடம் இறுதியில் படப்பிடிப்பினை தொடங்கி 2025ல் வெளியிட திட்டமிட்டுள்ளது.

சர்தார் - இயக்குனர் பி எஸ் மித்ரன் இயக்கத்தில் கார்த்தி, ராசி கண்ணா என பலர் நடித்துள்ள அதிரடி கிரைம் திரைப்படம், சர்தார். இப்படத்தின் வெற்றியை தொடர்ந்து தற்போது தமிழ் சினிமாவில் 'சர்தார் 2' படத்தினை தயாரிக்க திட்டமிட்டுள்ளனர். மீண்டும் ஸ்பை திரில்லர் படமாக இப்படம் உருவாகிறது, இப்படத்திற்கான திரைக்கதை பணிகளை இயக்குனர் ஏற்கனவே தொடங்கியுள்ளார், என படக்குழுவினர் கூறியுள்ளனர்.

செல்வராகவன் இயக்கத்தில் கார்த்தி நடிப்பில் வெளியான திரைப்படம், ஆயிரத்தில் ஒருவன். இப்படம் வெளியாகி பல ஆண்டுகளுக்கு பின் தற்போது தமிழ் சினிமாவில் பெரிய அளவில் பேசப்பட்டு வருகிறது. இன்றைய ரசிகர்கள் மத்தியில் விமர்சனம் ரீதியாக கொண்டாடப்படும் 'ஆயிரத்தில் ஒருவன்' திரைப்படத்தின் தொடர்ச்சியாக ஆயிரத்தில் ஒருவன் 2 திரைப்படம் உருவாக திட்டமிட்டுள்ளனர், படக்குழுவினர். இப்படத்தில் கார்த்தி - தனுஷ் இருவரும் முக்கிய முன்னணி கதாபாத்திரத்தில் நடிக்க உள்ளனர்.

இயக்குனர் சதீஸ் செல்வகுமார் தமிழ் சினிமாவில் 'பேச்சிலர்' படத்தினை இயக்கி அறிமுகமானார். ஜி வி பிரகாஷ் குமார் - திவ்யா பாரதியின் நடிப்பில் இரு சிறு பட்ஜெட் படமாக வெளியாகி தமிழில் ஹிட் அடித்துள்ளது, பேச்சிலர். இப்படத்தினை வெற்றிக்கு பின் இந்த இயக்குனர் தனது அடுத்த படத்தில் நடிகர் கார்த்தியுடன் பயணிக்கவுள்ளார். நடிகர் கார்த்தி தன் சினிமா தொடக்க காலகட்டத்தில் பருத்திவீரன், பையா என காதல் படங்களில் நடித்து பிரபலமானவர். தற்போது மீண்டும் காதல் படங்களில் நடிக்க ஒப்பந்தமாகி வருகிறார்.