தரமான தமிழ் படங்கள் இல்லாமல் வீழ்ச்சி அடைத்த கோலிவுட்... பெரிய ஹீரோக்கள் எங்கே சென்றனர்?

2024 ஆம் ஆண்டு தமிழ் சினிமாவில் வெளியாகியுள்ள பல திரைப்படங்களில் எந்த திரைப்படமும் பெரிய அளவில் வசூல் மற்றும் விமர்சனத்தில் இன்னும் பேசப்படவில்லை. இந்த ஆண்டு தொடக்கத்தில் தனுஷின் கேப்டன் மில்லர் மற்றும் சிவகார்த்திகேயனின் அயலான் ஆகிய படங்கள் வெளியாகின. இந்த இரண்டு படங்களும் மக்களின் கவனத்தை கவர தவறியுள்ளது. இப்படங்களை தொடர்ந்து வெளியான பல திரைப்படங்கள் மாபெரும் தோல்வியை சந்தித்துள்ளது.

2024 ஜனவரி முதல் ஏப்ரல் வரை நடக்கக்கூடிய தமிழ் சினிமா நிலவரத்தை அடிப்படையாக கொண்டு இந்த தொகுப்பு உருவாக்கப்பட்டிருக்கிறது.

2024 ஜனவரி மாதம் வெளியான கேப்டன் மில்லர், அயலான் ஆகிய பெரிய பேனர் படங்களுக்கு பின் தமிழ் சினிமாவில் எந்த ஒரு பெரிய பட்ஜெட் படங்களும் வெளியாகவில்லை. சிறிய பட்ஜெட் படங்களாக பல சிறுபடங்கள் வெளியாகியும் நல்ல கதைக்களம் மற்றும் தரம் இல்லாமல் ரசிகர்களின் வரவேற்பை பெற தவறியுள்ளது.

தமிழ் படங்களின் தரம் குறைந்துவிட்டது என பல விமர்சகர்கள் தங்களின் கருத்துகளை சமூக வலைத்தளத்தில் பகிர்ந்து வருகின்றனர். ஒவ்வொரு வாரமும் 5 முதல் 8 தமிழ் படங்கள் வரை வெளியாகி வருகிறது, அறிமுக நடிகர்கள், அறிமுக இயக்குனர் என பல சிறிய பட்ஜெட் படங்கள் வெளியாகினும், சரியான கதைக்களம் இல்லத்தகால் பல வெற்றி படங்கள் இல்லாமல் தவிக்கிறது, தமிழ் சினிமா.

தமிழ் சினிமாவில் 2024ல் பிற மொழி படங்களான ப்ரேமலு, ஹனுமான், மஞ்சுமல் பாய்ஸ், காட்ஜில்லா அண்ட் காங்: தி நியூ எம்பையர் என பல படங்கள் வெளியாகி ஹிட் அடித்துள்ளது. மலையாளம், தெலுங்கு மற்றும் ஹாலிவுட் சினிமா படங்களுக்கு தமிழ் சினிமா ரசிகர்கள் பெரும் வரவேற்பு அளித்து கொண்டாடுகின்றனர். இதற்கு முக்கிய காரணம் தரமான தமிழ் படங்கள் இந்த ஆண்டு இதுவரை வெளியாகாத காரணம் தான்.

தமிழ் சினிமாவில் பல கோடிகளை சம்பளமாக வாங்கி கொண்டிருக்கும் டாப் நடிகர்களான ரஜினிகாந்த் - வேட்டையன், அஜித் குமார் - விடாமுயற்சி, விஜய் - கோட் ஆகிய படங்களில் நடித்து வருகின்றனர். பின்னர் சூர்யா - கங்குவா, விக்ரம் - தங்கலான், சிவகார்த்திகேயன், தனுஷ் என பலர் பல படங்களில் நடித்து வருகின்றனர். பெரிய ஹீரோக்கள் படங்கள் தற்போது வெளியாகாத காரணத்தால் பல சிறு பட்ஜெட் படங்களுக்கு வாய்ப்பு கிடைத்துள்ளது, ஆனால் சரியான கதைக்களம் மற்றும் சுவாரசியம் இல்லாத கதை காரணத்தால் சிறு பட்ஜெட் படங்கள் பாக்ஸ் ஆபிஸில் இடம்பெற மறுக்கிறது.

தமிழ் சினிமா பெரிய பட்ஜெட் படங்களான கோட், விடாமுயற்சி, வேட்டையன், கங்குவா, இந்தியன் 2 என பல படங்கள் 2024 இரண்டாம் பாதியில் ஜூன் மாதத்திற்கு பின் வெளியிட வரிசை கட்டி நிற்கிறது. 2024 முதல் பாதியில் எலெக்ஷன் காரணமாக பல படங்கள் வெளியாகாமல் உள்ள நிலையில், இரண்டாம் பாதியில் தமிழ் ரசிகர்களுக்கு கொண்டாட்டம் தான் என கோலிவுட் நிபுணர்கள் பலர் கூறிவருகின்றனர்.