Leo Blockbuster: லியோ பாக்ஸ் ஆபிஸ் சம்பவம், முதல் வார வசூலில் சாதனை படைத்த தளபதி விஜய்

Author Sakthi Harinath | Published: Friday, October 27, 2023, 12:00 AM [IST]

Leo Blockbuster: லியோ பாக்ஸ் ஆபிஸ் சம்பவம், முதல் வார வசூலில் சாதனை படைத்த தளபதி விஜய். லியோ திரைப்படம் 2023 அக்டோபர் 19ல் வெளியாகி உலகளவில் பல சாதனைகள் படைத்து வருகிறது. லியோ படம் வெளியாகி முதல் வார முடிவில் இப்படம் உலகளவில் 461+ கோடிகள் வசூல் செய்துள்ளது என இப்படத்தின் தயாரிப்பாளர் லலித் குமார் தனது சமூக வலைத்தளத்தில் அதிகாரப்பூர்வமாக போஸ்டர் ஒன்றை வெளியிட்டுள்ளார், இதனை பற்றிய முழு விவரங்கள் இதோ.

உள்ளடக்கப்பட்டியல்

லியோ - இயக்குனர் லோகேஷ் கனகராஜ் இயக்கத்தில் விஜய், திரிஷா கிருஷ்ணன், மன்சூர் அலிகான், அர்ஜுன் என தமிழ் திரைப்பட முன்னணி முக்கிய நட்சத்திரங்கள் பலர் இணைந்து நடித்திருக்கும் அதிரடி - திரில்லர் திரைப்படம். இப்படத்தினை தமிழ் சினிமா முன்னணி தயாரிப்பாளரான லலித் குமார் தனது '7 ஸ்க்ரீன் ஸ்டூடியோ' தயாரிப்பு நிறுவனத்தின் மூலம் தயாரிக்க, இசையமைப்பாளர் அனிருத் ரவிச்சந்தர் இசையமைத்துள்ளார்.

தமிழ் சினிமா ரசிகர்கள் குடும்பங்களோடு ரசிக்கும் வகையில் சுவாரஸ்யமான அதிரடி திரைக்கதை வடிவமைத்து உருவாக்கியுள்ள லியோ படத்திற்கு ஒளிப்பதிவாளர் மனோஜ் பரமஹம்ஸ ஒளிப்பதிவு செய்ய, படத்தொகுப்பாளர் பிலோமின் ராஜ் எடிட்டிங் செய்துள்ளார்.

மாஸ்டர் படத்தினை தொடர்ந்து இயக்குனர் லோகேஷ் கனகராஜ் இப்படத்தின் மூலம் இரண்டாவது முறையாக விஜய்-யோடு கூட்டணி அமைத்துள்ளார். வாரிசு படத்திற்கு பின் லியோ படப்பிடிப்பு தொடங்கியது. இப்படம் தயாராகும் காலகட்டத்தில் இருந்து ரசிகர்கள் மத்தியில் பெரிய அளவில் லியோ படம் எதிர்பார்க்கப்பட்டு வருகிறது. காஸ்மீர் மற்றும் பல இடங்களில் லியோ படத்தின் படப்பிடிப்பு முடித்து இப்படத்தின் ப்ரோமோஷன் மற்றும் பிரத்யேக பேட்டி என படக்குழு பல சுவாரஸ்யங்களை ரசிகர்களுக்கு கூறி எதிர்பார்ப்பை எகிற வைத்துள்ளது.

பார்த்திபன் (விஜய்) தனது மனைவி திரிஷா கிருஷ்ணன் மற்றும் மகளுடன் வாழ்ந்து வருகிறார். இவர் ஒரு பேக்கரி கடையை முதலாளியாக நிர்வாகம் செய்கிறார். இவர் வாழும் இடத்தில் சில அநீதிகள் நடக்க, அந்த பிரச்சனையில் சிக்கி தப்பிக்கிறார். இதனால் இவர் அந்த இடத்தில் பிரபலமாகிறார்.

இவரது பிரபலத்தால் பல இடங்களில் செய்திகள் பரவ, ஒரு போதை கடத்தல் கும்பல் இவரை தேடி வருகிறது. இவரை கொன்று பழி தீர்க்க துடிக்கும் அந்த போதை கும்பலிடம் இருந்து இவர் எப்படி தப்பிக்கிறார். எதற்காக இவரை அந்த கும்பல் கொல்ல துடிக்கிறது? யார் இவர் என்பதே படத்தின் கதை.

தமிழ் சினிமா ரசிகர்களின் பெரும் எதிர்பார்ப்புகளுக்கு மத்தியில் லியோ படம் 2023, அக்டோபர் 19ல் உலகமெங்கும் வெளியானது. லியோ திரைப்படம் ரிலீஸான முதல் நாளில் இருந்து பெரிய அளவில் வசூல் சாதனை படைத்துள்ளது. அதிக திரையரங்கில் திரையிடப்பட்ட லியோ படம், இந்த ஆண்டின் முதல் நாள் வசூலில் நம்பர் 01 படமாக புகழ் பெற்றுள்ளது.

லியோ திரைப்படத்தின் தொலைக்காட்சி ஒளிபரப்புவதற்கான உரிமையை சன் டிவி நிறுவனம் பெற்றுள்ள நிலையில், இப்படத்தின் ஆன்லைன் டிஜிட்டல் ஸ்ட்ரீமிங் உரிமையை நெட்ப்ளிக்ஸ் நிறுவனம் கைப்பற்றியுள்ளது. மேலும் லியோ திரைப்படம் ஓடிடி தளத்தில் நவம்பர் 21ல் ஸ்ட்ரீமிங் செய்யப்படவுள்ளது என பல தகவல்கள் வெளியாகியுள்ளது.

லியோ திரைப்படம் 2023 அக்டோபர் 19ல் வெளியாகி ரசிகர்கள் மத்தியில் கலவையான விமர்சனம் பெற்றுள்ளது. இருப்பினும் இப்படம் வசூல் ரீதியாக பிரமாண்ட சாதனை படைத்திருக்கிறது. முதல் நாள் வசூல் மட்டும் உலகளவில் லியோ படம் 148.65 கோடிகள் வசூல் செய்துள்ளதாக இப்படத்தின் தயாரிப்பாளர் லலித் தனது சமூக வலைதள பக்கத்தில் அதிகாரப்பூர்வமாக அறிவித்துள்ளார். 2023 ஆம் ஆண்டின் இதுவரை வெளியான திரைப்படங்களில் லியோ படத்தின் முதல் வசூல் முதலிடம் பிடித்து சாதனை படைத்திருக்கிறது.

லியோ திரைப்படம் வெளியான முதல் வார முடிவில் இப்படம் உலகளவில் 461+ கோடிகள் வசூல் செய்திருக்கிறது என இப்படத்தின் தயாரிப்பாளர் லலித் குமார் தனது சமூக வலைதள பக்கத்தில் அதிகாரப்பூர்வமாக தெரிவித்துள்ளார். இதன் மூலம் எந்த தமிழ் படமும் படைக்காத ஒரு பிரமாண்ட சாதனையை லியோ படத்தின் மூலம் நடிகர் விஜய் படைத்துள்ளார் என அவரது ரசிகர்கள் கொண்டாட்டத்தில் உள்ளனர்.