சூர்யாவின் கங்குவா டீசர்: 2 வருட காத்திருப்புக்கு பலன் கிடைத்ததா? இல்லையா?

கங்குவா - இயக்குனர் 'சிறுத்தை' சிவா இயக்கத்தில் தயாரிப்பாளர் கே இ ஞானவேல் ராஜா தயாரிப்பில் நடிகர் சூர்யா சிவகுமார் முன்னணி கதாபாத்திரத்தில் நடித்திருக்கும் திரைப்படம். இப்படம் நடிகர் சூர்யாவின் திரைவாழ்வில் இவர் நடிக்கும் 42வது படமாகும். இப்படத்திற்கு இசையமைப்பாளர் தேவி ஸ்ரீ பிரசாத் இசையமைத்துள்ளார்.

சூர்யாவின் கங்குவா திரைப்பட டீசர் 2024 மார்ச் 20ல் வெளியாகி ரசிகர்கள் மத்தியில் கொண்டாடப்பட்டு வருகிறது. அதிநவீன தொழில்நுட்ப உதவில் ஹாலிவுட் சினிமா தரத்திற்கு VFX மற்றும் கிராபிக்ஸ் பயன்படுத்தி கங்குவா படத்தின் தரத்தை உயர்த்தியுள்ளனர், படக்குழுவினர். இப்படத்தின் இயக்குனர் சிறுத்தை சிவா இயக்கத்தில் இதுவரை வெளியான விஸ்வாசம், வீரம், சிறுத்தை ஆகிய படைப்புகளுக்கு மத்தியில் கங்குவா திரைப்படம் பெரிய அளவில் பேசப்படும் என இப்படத்தின் நாயகன் சூர்யா சிவகுமார் கூறியுள்ளார்.

2022ஆம் ஆண்டு சூர்யா நடிப்பில் வெளியான 'எதற்கும் துணிந்தவன்' திரைப்படத்திற்கு பின் அதே ஆண்டு நடிகர் சூர்யா கௌரவ வேடத்தில் நடித்த விக்ரம் மற்றும் ராகேட்ரி: நம்பி விளைவு ஆகிய திரைப்படங்கள் வெளியாகின. பின்னர் இரண்டு ஆண்டுகளாக நடிகர் சூர்யா கங்குவா படத்தில் மட்டுமே நடித்து வருகிறார். தொடர்ந்து கங்குவா படத்தின் படப்பிடிப்பில் பணியாற்றி வரும் சூர்யாவுக்கு இப்படம் பெரிய மைலேஜ் கொடுக்கும் என பலர் எதிர்பார்த்துள்ளனர்.

கங்குவா திரைப்படம் அதிநவீன தொழிநுட்ப உதவியில் ஹைடெக் VFX மற்றும் கிராபிக்ஸ் அம்சங்களை பயன்படுத்தி உருவாக்கப்பட்டிருக்கிறது. தொடக்கத்தில் இப்படத்தின் அறிவிப்பு ப்ரோமோ, டைட்டில் அறிவுப்பு வீடியோ, முன்னோட்டம் என சில வீடியோக்கள் வெளியாகி பிரபலமான நிலையில், இப்படத்தின் VFX மற்றும் கிராபிக்ஸ் காட்சிகள் தொடர்பாக சில விமர்சனங்கள் எழுந்தன. இப்படத்திற்கு எதிராக இருக்கக்கூடிய தவறுகளை மாற்றியமைத்து இப்படத்தின் டீசரை வெளியிட்டுள்ளனர், படக்குழுவினர். நடிகர் சூர்யா சிவகுமார் திரைப்பயணத்தில் எந்த திரைப்படமும் இல்லாத அளவில் கங்குவா திரைப்படத்தின் பட்ஜெட் அமைந்துள்ளது.

கங்குவா திரைப்படத்தினை தொடர்ந்து நடிகரின் சூர்யாவின் அட்டகாசமான லைன்அப் மூவிஸ் என ரசிகர்கள் மத்தியில் பிரபலமான வெற்றிமாறன் - சூர்யாவின் வாடிவாசல் மற்றும் சுதா கொங்கரா இயக்கத்தில் சூர்யா நடிக்கும் புறநானுறு ஆகிய இரு படங்களும் தற்போது சில காரணங்களால் தள்ளிச்சென்றுள்ளது, மேலும் இந்த இரு பெரிய பட்ஜெட் திரைப்படங்களும் கைவிடப்பட்டது என சில சினிமா செய்தியாளர்கள் கூறியுள்ளனர். இதனால் சூர்யா ரசிகர்கள் பலர் அதிர்ச்சி அடைந்துள்ளனர்.