Chutney Sambar: ஹாட்ஸ்டார் ஓடிடியில் கலக்கல் காமெடியில் 'சட்னி சாம்பார்' வெப் தொடர்...

சட்னி சாம்பார் - இயக்குனர் ராதா மோகன் இயக்கத்தில், தயாரிப்பாளர் ஐசரி கே கணேஷ் தயாரிப்பில் உருவாகி டிஸ்னி பிளஸ் ஹாட்ஸ்டார் ஓடிடி செயலியில் 2024 ஜூலை 26ல் ஸ்ட்ரீமிங் ஆகியுள்ள வெப் சீரிஸ் தொடர், சட்னி சாம்பார். இந்த தொடரில் யோகி பாபு முன்னணி கதாபாத்திரத்தில் நடிக்க, நிழல்கள் ரவி, சந்திரன், நித்தின் சத்யா, மைனா நந்தினி, மீரா கிருஷ்ணன், சம்யுக்தா என பல தமிழ் சினிமா நட்சத்திரங்கள் நடித்துள்ளனர்.

நிழல்கள் ரவி தனது இளம் வயதில் அமுதா (தீபா ஷங்கர்) உடன் பழகி வந்துள்ளார். பின் சில காரணங்களால் அமுதாவை பிரிந்த நிழல்கள் ரவி, 'அமுதா கஃபே' என்ற ஹோட்டல் நிறுவி பணியாற்றி வருகிறார். நாட்கள் கடக்க மீரா கிருஷ்ணன்-யை திருமணம் செய்துகொண்டு வாழ்கிறார், நிழல்கள் ரவி.

தனது கடைசி காலத்தில் நிழல்கள் ரவி, மகன் சந்திரன்-யை அழைத்து அமுதா பற்றிய விவரங்களை சொல்கிறார். பின்பு தனது மூத்த மகனை அழைத்து வரும் படி சத்யம் வாங்குகிறார். சந்திரன் தனது அண்ணன் யோகி பாபு-வை சந்தித்து ஊட்டிக்கு அழைத்து வருகிறார். பிறகு நடக்கும் சுவாரஸ்யங்கள் தான் இந்த வெப் சீரிஸ் தொடர்.

சட்னி சாம்பார் வெப் சீரிஸ் தொடர் 'டிஸ்னி பிளஸ் ஹாட்ஸ்டார்' செயலியில் 2024 ஜூலை 26ல் ஸ்ட்ரீமிங் ஆகியுள்ளது. நகைச்சுவை நிறைந்த கதைக்களத்தில் உருவாகியுள்ள இந்த தொடர் நேரடியாக ஓடிடி தளத்தில் வெளியிட்டு பலரின் கவனத்தை கவர்ந்துள்ளனர். இந்த தொடர் ஹாட்ஸ்டார் ஸ்பெஷல் வழங்கும் பிரத்யேகமாக டிஸ்னி ஓடிடி தளத்திற்கு சொந்தமான படைப்பு ஆகும்.

யோகி பாபு தமிழ் சினிமாவில் அதிக சம்பளம் வாங்கி வரும் நகைச்சுவை நடிகர், ஆனால் அவர் நடிக்கும் படங்களில் பெரிய அளவில் நகைச்சுவை இல்லாமல் வருகிறது. யோகிபாபு-வுக்கு நகைச்சுவை சரக்கு தீர்ந்தது என பலர் தங்களின் கருத்துகளை சமூக வலைத்தளத்தில் பதிவு செய்து வரும் நிலையில், தற்போது வெளியாகியுள்ள 'சட்னி சாம்பார்' வெப் சீரிஸ் தொடர் பலரின் கருத்துகளுக்கு முற்று புள்ளி வைத்துள்ளது. இந்த தொடரில் நகைச்சுவை நிறைந்த காட்சிகள் பல இடங்களில் சிரிக்க வைக்கிறது.