Jailer Success Party: படக்குழுவினருக்கு சொகுசு கார்களை பரிசளிக்கும் தயாரிப்பாளர் கலாநிதி மாறன்

ஜெயிலர் - இயக்குனர் நெல்சன் திலீப்குமார் இயக்கத்தில் சூப்பர்ஸ்டார் ரஜினிகாந்த் முன்னணி கதாபாத்திரத்தில் நடித்திருக்கும் அதிரடி & திரில்லர் திரைப்படம். இப்படத்தினை தமிழ் திரையுலக பிரபல முன்னணி தயாரிப்பு நிறுவனமான 'சன் பிக்சர்ஸ்' தயாரிப்பு நிறுவன சார்பில் தயாரிப்பாளர் கலாநிதி மாறன் தயாரிக்க, இசையமைப்பாளர் அனிருத் ரவிச்சந்தர் ஜெயிலர் படத்திற்கு இசையமைத்துள்ளார்.

அதிரடி ஆக்ஷன் மற்றும் திரில்லர் திரைக்கதையில் உருவாகியுள்ள ஜெயிலர் திரைப்படத்தில் ஒளிப்பதிவாளர் விஜய் கார்த்திக் கண்ணன் ஒளிப்பதிவு செய்ய, படத்தொகுப்பாளர் நிர்மல் ஆர் எடிட்டிங் செய்துள்ளார். இத்திரைப்படத்தில் ரம்யா கிருஷ்ணன், ஷிவ ராஜ்குமார், மோகன்லால், யோகி பாபு, மிர்னா என பல முக்கிய பிரபலங்கள் முன்னணி கதாபாத்திரத்தில் நடித்து கலக்கியுள்ளனர்.

ஓய்வு பெற்ற போலீஸ் அதிகாரி தனது குடும்பத்தோடு அமைதியாக வாழ்ந்து வருகிறார், இந்நிலையில் போலீஸ் அதிகாரியான தனது மகனை சிலர் கடத்தியுள்ளனர் என்று அறியும் நாயகன் ரஜினி, எலி போல தனது ஓய்வு காலத்தில் வாழும் நாயகன் மீண்டும் புலியாக மாறி தனது குடும்பத்தை காப்பாற்றுவதே இந்த படத்தின் கதை.

ஜெயிலர் திரைப்படம் விமர்சனம் ரீதியாக ரசிகர்கள் மத்தியில் பெரிய அளவில் கொண்டாடப்பட்டுள்ளது. சில விமர்சனங்கள் கலவையான ரிசல்ட் பெற்றாலும், ரசிகர்களால் கொண்டாடப்பட்ட படமாக ஜெயிலர் புகழ் பெற்றுள்ளது. விக்ரம் பட சாயல் போன்ற பல எதிர்மறையான விமர்சனங்கள் இப்படங்களுக்கு கிடைத்தாலும் இப்படம் பெரிய அளவில் ரசிகர்கள் மத்தியில் வரவேற்கப்பட்டு பிரபலமானது.

ஜெயிலர் திரைப்படம் வசூல் ரீதியாக பெரிய அளவில் சாதனை படைத்துள்ளது. 600 கோடிகளுக்கு மேல் வசூல் சாதனை செய்துள்ள ஜெயிலர் பல சாதனை பட்டியலில் இடம் பிடித்து கொண்டாடப்படுகிறது. இப்படத்தினை பெரிய அளவில் வரவேற்த்து வசூல் ரீதியாக இமாலய வெற்றி பெற வைத்த ரசிகர்களுக்கு நன்றி என பல இடங்களில் படக்குழு தெரிவித்து வருகிறது. இதுவரை தமிழ் சினிமாவில் 600 கோடிகளுக்கு மேல் வசூல் செய்துள்ள படங்கள் பட்டியலில் ரஜினியின் ஜெயிலர் மற்றும் 2.0 என இரு படங்கள் மட்டுமே உள்ளன.

தொடர்ந்து பல படங்களில் தனது மார்க்கெட்டை இழந்து வந்த ரஜினிகாந்த், ஜெயிலர் திரைப்படத்தின் பிளாக்பஸ்டர் ரிசல்ட் மூலம் தான் யார் என்பதை தமிழ் சினிமாவில் நிரூபித்துள்ளார். வசூல் மற்றும் விமர்சனம் என ரசிகர்களை பூரண திருப்திப்படுத்தி தனது திரைவாழ்க்கையை சிறப்பித்துள்ளார், ரஜினிகாந்த்.

ஜெயிலர் திரைப்படம் 200 கோடி பொருட்செலவில் உருவாக்கப்பட்டு, தற்போது 600 கோடிகளுக்கு மேல் வசூல் செய்து பிரமாண்ட சாதனை படைத்து வருகிறது. இந்த வெற்றியை கொண்டாடும் விதமாக ஜெயிலர் படத்தினை தயாரித்த சன் பிக்சர்ஸ் நிறுவனத்தின் உரிமையாளர் கலாநிதி மாறன் இப்படத்தின் நாயகன் ரஜினிகாந்த் மற்றும் இயக்குனர் நெல்சன் திலீப்குமாருக்கு சொகுசு கார்களை பரிசளித்து அசத்தியுள்ளார்.

நடிகர் ரஜினிகாந்த்-க்கு BMW X7 புதிய ரக காரை பரிசளித்த கலாநிதி மாறன், நெல்சன் திலீப்குமாருக்கு Porsche காரை பரிசளித்துள்ளார்.