Thangalaan Box Office: பாக்ஸ் ஆபிஸில் அலறவிட்ட 'தங்கலான்'.. முதல் நாள் வசூல் விவரங்கள்!

தங்கலான் - இயக்குனர் பா ரஞ்சித் இயக்கத்தில் சியான் விக்ரம் நாயகனாக நடித்திருக்கும் அதிரடி திரில்லர் திரைப்படம். இப்படத்தினை தமிழ் சினிமா முன்னணி தயாரிப்பாளரான கே ஈ ஞானவேல் ராஜா தனது ஸ்டுடியோ கிரீன் தயாரிப்பு நிறுவனம் மூலம் தயாரிக்க, இவருடன் இணைந்து இப்படத்தின் இயக்குனர் பா ரஞ்சித் தனது நீலம் புரொடக்சன்ஸ் நிறுவனத்தின் மூலம் தயாரிக்க, இசையமைப்பாளர் ஜி வி பிரகாஷ் குமார் இசையமைத்துள்ளார்.

அதிரடி - திரில்லர் படமாக உருவாகியுள்ள 'தங்கலான்' திரைப்படத்திற்கு ஒளிப்பதிவாளர் கிஷோர் குமார் ஒளிப்பதிவு செய்ய, படத்தொகுப்பாளர் செல்வா ஆர் கே எடிட்டிங் செய்துள்ளார். சியான் விக்ரம் நாயகனாக நடிக்க இவருடன் இணைந்து மாளவிகா மோகனன், பார்வதி, பசுபதி, ஹரி கிருஷ்ணன் அன்பதுரை, முத்துக்குமார், டேனியல் என பல சினிமா முன்னணி நட்சத்திரங்கள் முக்கிய கதாபாத்திரத்தில் நடித்துள்ளனர்.

2024 ஆம் ஆண்டு ஆகஸ்ட் 15ல் சுதந்திர தின ஸ்பெஷல் திரைப்படமாக திரையரங்கில் வெளியாகும் 'தங்கலான்' திரைப்படத்திற்கு தமிழக திரைப்பட தணிக்கை குழு 'யு/ஏ' சான்றிதழ் அளித்துள்ளது.

கர்நாடக மாநிலத்தின் கோலார் பகுதியில் தங்கத்தை தேடி பல அரசர்கள் மற்றும் அதிகாரம் படைத்த பலர் அலைந்துள்ளனர். இந்தியாவில் ஆட்சி அமைத்த பின் ஆங்கிலேயர் பலர் அந்த பகுதியில் தங்கத்தை கண்டுபிடிக்க முயற்சித்துள்ளனர். கோலார் அருகில் வட ஆற்காடு பகுதியில் வாழும் வேப்பூர் கிராமத்து மக்கள் தான் தங்கத்தை எடுக்க சரியான ஆட்கள் என்று கணித்த ஆங்கிலேய துரையான கிளெமண்ட் (டேனியல் கால்டாகிரோன்) தங்கலான் (சியான் விக்ரம்)-யை சந்தித்து தங்கத்தை எடுக்க முயற்சி செய்கிறார்.

கோலார் பகுதியை ஆளும் ஜமீன் (முத்துக்குமார்) அங்கு வாழும் தாழ்த்தப்பட்ட மக்கள் வாழும் நிலங்களை அபகரிக்க முயற்சி செய்து வருகிறார். அந்த நிலம் தனக்கு சொந்தமானது என சொல்லி மக்களை அடிமைப்படுத்தி வேலை வாங்கி வருகிறார்.

ஊர் தலைவர் தங்கலான் (விக்ரம்) தனது மனைவி கங்கம்மா (பார்வதி) மற்றும் குழந்தைகள் என சொந்த ஊரில் விவசாயம் செய்து வருகிறார். வெள்ளைக்காரர் டேனியல் விக்ரம் மற்றும் ஊர் மக்களை சந்தித்து தங்கம் தேட உதவுங்கள் என சொல்ல, ஜமீன் போன்றவர்களிடம் இருந்து தப்பிக்க வெள்ளையருக்கு தங்கத்தை எடுத்துக் கொடுத்தால் வெள்ளைக்காரன் நம்மை மேன்மைப்படுத்துவான், நம் அடிமை விலங்கு அகன்று போகும் என தனது மக்களுடன் போராடும் தங்கலான் தங்கத்தை எடுக்க முயற்சி செய்கிறார்.

தங்கத்தை பற்றியும் அதை காக்கும் நாகர் இன தலைவி ஆரத்தி பற்றியும் தனது குழந்தைகளுக்கு விக்ரம் கதை சொல்லும் வழியாக தங்கலானின் பாட்டன் காடயன் ஆரத்தியை வீழ்த்தி சோழ மன்னனுக்கு எப்படி தங்கத்தை எடுத்துக் கொடுத்தான் என்கிற கதையை காட்டுகின்றனர். 

இறுதியில் தங்கலானுக்கு தங்கம் கிடைத்ததா? இல்லையா? என்பது தான் இந்த படத்தின் கதை.

விக்ரம் - தங்கலான், காடையன் (தாதா), அரசன் (ஆரத்தி கணவர்), ஆதிமுனி, நாகமுனி என 5 வெவ்வேறு கதாபாத்திரங்களில் நடித்துள்ளார். விமர்சனம் ரீதியாக இப்படம் தமிழ் சினிமாவில் பலரின் பாராட்டுகளை பெற்றுள்ளது. நடிப்பில் தனி நபராக இந்த படத்தினை காப்பாற்றியுள்ளார், விக்ரம். இந்த படத்திற்கு நமது பில்மிபீட் நிறுவனம் சார்பில் (3/5) ரேட்டிங் அளிக்கப்பட்டுள்ளது.

தங்கலான் படத்தினை பார்த்த ரசிகர்கள் சமூக வலைத்தளத்தில் தங்களின் கருத்துகளை பகிர்ந்து வருகின்றனர். நடிப்பில் வெரைட்டி காட்டி நடித்துள்ள விக்ரம், ஒரு சமயத்தில் அவரது நடிப்பு பெரும் குழப்பம் ஏற்படுகிறது. 5 கதாபாத்திரம் ஒரே பாணியில் நடித்துள்ளார், சுதந்திரத்திற்கு முன் குறிப்பிட்ட காலகட்டத்தில் ஒரே தோரணையில் பல கதாபாத்திரத்தில் நடித்தது ஒரு குழப்பமாக இருக்கிறது. இதனால் பல ரசிகர்கள் இந்த படத்தினை கிண்டல் மற்றும் குறை சொல்லி வருகின்றனர்.

சுவாரசியம் இல்லாத திரைக்கதையில் இப்படத்தினை சொதப்பி உள்ளனர், படக்குழுவினர்.

தங்கலான் திரைப்படத்தில் பல காட்சிகளில் இயக்குனர் பா ரஞ்சித் தனது அரசியல் வசனங்களை பேசியுள்ளார். தாழ்த்தப்பட்டவர்களிடம் இருந்து நிலத்தை அபகரிப்பது, கோலார் தங்கம் உருவாக முக்கிய காரணம் மற்றும் வசனங்கள் ரீதியாகவும் பல அரசியல் பேச்சுகளை வைத்துள்ளார், பா ரஞ்சித். மொத்தத்தில் தங்கலான் திரைப்படம் வரலாறு சார்ந்த பா ரஞ்சித் இயக்குனரின் அரசியல் பார்வை.

பெரும் எதிர்பார்ப்பில் 2024 ஆகஸ்ட் 15ல் வெளியான 'தங்கலான்' திரைப்படம் விமர்சனம் ரீதியில் நல்ல வரவேற்பினை பெற்றுள்ள நிலையில், வசூல் ரீதியாகவும் சாதனை படைத்துள்ளது. இப்படத்தின் நாயகன் விக்ரம் நடிப்பில் இதுவரை வெளியான படங்களில் எந்த படம் படைக்காத சாதனையை 'தங்கலான்' திரைப்படம் வசூல் ரீதியில் படைத்துள்ளது.

முதல் நாள் வசூலில் 'தங்கலான்' திரைப்படம் ₹26.44 கோடிகள் வசூலித்துள்ளது. இதுவரை விக்ரம் நடித்த படங்களில் இந்த படம் தான் முதல் நாள் வசூலில் முன்னிலை படைத்திருக்கிறது. இப்படத்தினை தயாரித்த ஸ்டூடியோ கிரீன் நிறுவனம் 'தங்கலான்' முதல் நாள் வசூல் பற்றிய அதிகாரபூர்வ அறிவிப்பை போஸ்டர் மூலம் அறிவித்துள்ளது.