ஜெயிலர் பிளாக்பஸ்டர் வெற்றிக்கு காரணம் கதையா? கதாபாத்திரமா? - முழு அலசல் இதோ

ஜெயிலர் - இயக்குனர் நெல்சன் திலீப்குமார் இயக்கத்தில் சூப்பர்ஸ்டார் ரஜினிகாந்த் முன்னணி கதாபாத்திரத்தில் நடித்திருக்கும் அதிரடி & திரில்லர் திரைப்படம். இப்படத்தினை தமிழ் திரையுலக பிரபல முன்னணி தயாரிப்பு நிறுவனமான 'சன் பிக்சர்ஸ்' தயாரிப்பு நிறுவன சார்பில் தயாரிப்பாளர் கலாநிதி மாறன் தயாரிக்க, இசையமைப்பாளர் அனிருத் ரவிச்சந்தர் ஜெயிலர் படத்திற்கு இசையமைத்துள்ளார்.

அதிரடி ஆக்ஷன் மற்றும் திரில்லர் திரைக்கதையில் உருவாகியுள்ள ஜெயிலர் திரைப்படத்தில் ஒளிப்பதிவாளர் விஜய் கார்த்திக் கண்ணன் ஒளிப்பதிவு செய்ய, படத்தொகுப்பாளர் நிர்மல் ஆர் எடிட்டிங் செய்துள்ளார். இத்திரைப்படத்தில் ரம்யா கிருஷ்ணன், ஷிவ ராஜ்குமார், மோகன்லால், யோகி பாபு, மிர்னா என பல முக்கிய பிரபலங்கள் முன்னணி கதாபாத்திரத்தில் நடித்து கலக்கியுள்ளனர்.

ஒரு ஜெயிலர் அதிகாரியாக பணியாற்றிய முத்துவேல் பாண்டியன் என்னும் ரஜினிகாந்த், தனது ஓய்வு காலத்தில் குடும்பத்தோடு சென்னையில் அமைதியாக வாழ்ந்து வருகிறார். இவரது மகனான வசந்த் ரவி ஒரு நேர்மையான போலீஸ் அதிகாரி, இவர் அசிஸ்டன்ட் கமிஷ்னராக பணியாற்றி வருகிறார். ரம்யா கிருஷ்ணன் மனைவி, பேரனாக ரித்விக் என தனது குடும்பத்தோடும் மகிழ்ச்சியாக வாழ்ந்து வருகிறார், முத்து வேல் பாண்டியன்.

சென்னையில் சிலை திருட்டு போன்ற பல சட்டவிரோதமான செயல்களை செய்து வரும் விநாயகன் என்பவரை ரஜினியின் மகன், வசந்த் ரவி தேடி வருகிறார். இந்நிலையில் வசந்த் ரவி தீடிரென காணாமல் போக, ரஜினியின் குடும்பம் நிலைகுலைகிறது. தனது மகனை நேர்மையாக வளர்த்தது தான் தன் மகன் இழப்பிற்கு காரணம் என ரஜினியை ரம்யா கிருஷ்ணன் திட்டி தீர்க்கிறார்.

ரஜினியின் மகனை கொன்ற விநாயகன், பின் ரஜினியின் பேரனின் மீது குறிவைக்கிறார். தனது குடும்பத்தின் பாதுகாப்பிற்காக மீண்டும் அடிதடியில் களம் இறங்குகிறார், ரஜினி. பின் தனது நண்பர்களான ஷிவ ராஜ்குமார் மற்றும் மோகன்லால் உதவியோடு விநாயகன் மற்றும் அவரின் மொத்த கூட்டத்தையும் முத்து வேல் பாண்டியன் எப்படி அழிக்கிறார் என்பதே ஜெயிலர் திரைப்படத்தின் முழு கதை.

ஜெயிலர் திரைப்படத்தில் நடிகர் ரஜினிகாந்த் 'முத்துவேல் பாண்டியன்' கதாபாத்திரத்தில் நடித்து கலக்கியுள்ளார். இவரின் இந்த கதாபாத்திரம் சரியான முறையில் வடிவமைக்கப்பட்டு ரஜினியின் ரசிகர்கள் மத்தியில் கொண்டாடப்பட்டு வருகிறது. அமைதியான நபராகவும், தனது பேரனின் யூ டியூப் சேனலுக்கு வீடியோ எடுத்து கொடுப்பது போன்ற விஷயங்களை செய்து வரும் சாதுவான கதாபாத்திரமாக உள்ளது, ரஜினியின் கதாபாத்திரம். ரஜினியின் ரசிகர்கள் இதுவரை கண்டிராத வேறு ஒரு பரிமாணத்தில் ரஜினிகாந்த் இந்த படத்தில் நடித்துள்ளார்.

ஜெயிலர் இரண்டாம் பாதியில் முற்றியும் வேறுபட்ட கதாபாத்திரமாக ரஜினிகாந்த் நடித்துள்ளார். அதிரடி ஆக்ஷன் நாயகனாக இவர் கலக்கும் காட்சிகள் ரசிகர்களுக்கு கொண்டாட்டம் தான். முதல் பாதியில் சாது இரண்டாம் பாதியில் டைகர் என இரு வெரைட்டி கதாபாத்திரத்தில் நடித்து கலக்கியுள்ளார் ரஜினி.

அஷ்டலக்ஷ்மி பாண்டியன் என்ற கதாபாத்திரத்தில் நடிகை ரம்யா கிருஷ்ணன் நடித்துள்ளார். ரஜினிகாந்த் - ரம்யா கிருஷ்ணன் படையப்பா படத்திற்கு பின் 24 ஆண்டுகளுக்கு பிறகு இந்த படத்தில் தான் இணைந்து பணியாற்றியுள்ளனர். தமிழ் திரையுலகில் இந்த ஜோடி பெரிய அளவில் கொண்டாடப்பட்ட ஜோடி ஆகும். மீண்டும் ஜெயிலர் திரைப்படத்தில் ரஜினி - ரம்யா கிருஷ்ணன் கதாபாத்திரம் பெரிய அளவில் பேசப்படுகிறது.

சூப்பர்ஸ்டார் ரஜினிகாந்த் திரைப்படத்தில் கன்னட சினிமாவின் சூப்பர்ஸ்டார் ஷிவ ராஜ்குமார் மற்றும் மலையாள சினிமா சூப்பர்ஸ்டார் மோகன் லால் என ஒரே படத்தில் மூன்று சூப்பர்ஸ்டார் முன்னணி நடிகர்களை ஒன்றாக திரையில் காட்டி தென்னிந்திய சினிமாவை திரும்பி பார்க்க வைத்துள்ளார், இயக்குனர் நெல்சன் திலீப்குமார். மூன்று சூப்பர் ஸ்டார் நடிகர்களின் கதாபாத்திரத்தை இவர் கையாண்ட விதம் ரசிகர்கள் மத்தியில் கொண்டாடப்பட்டு வருகிறது.

டார்க் காமெடி மற்றும் அமைதியான ரஜினியின் கதாபாத்திரம், பின் ஆக்ஷன் திரில்லர் இரண்டாம் பாதியில் அதிரடியான ரஜினிகாந்த் என திரைக்கதையில் வெரைட்டி காட்டியுள்ளார், இயக்குனர் நெல்சன் திலீப்குமார். 

ஜெயிலர் திரைப்படத்திற்கு முக்கிய பலமே இசையமைப்பாளர் அனிருத் ரவிச்சந்தர் தான். பின்னணி இசை, பாடல்கள் என ரசிகர்களின் மனநிலைக்கு ஏற்ப ரஜினிக்கு மாஸான இசையமைத்துள்ளார், அனிருத் ரவிச்சந்தர். ஹும்கும் டைகர், காவாலா போன்ற பல வெற்றி பாடல்கள், முத்துவேல் பாண்டியன் தீம் என இசையில் இப்படத்திற்கு மிகப்பெரிய பலமாக அமைந்துள்ளார், அனிருத் ரவிச்சந்தர்.

நெல்சன் இயக்கிய ஜெயிலர் திரைப்படத்தின் பலம் கதையா? கதாபாத்திரமா? என்று பார்த்தால் இரண்டும் தான். முக்கியமாக ரஜினியின் ஸ்டைலான அலப்பறை நடிப்பு அதற்கேற்ப அமைந்துள்ள இசை மற்றும் கதைக்களம் என இப்படத்திற்கு அணைத்தும் சாதகமாக அமைந்ததே, ஜெயிலர் திரைப்படத்தின் வெற்றிக்கு காரணம்.