தமிழ் சினிமாவில் டேனியல் பாலாஜியின் அடையாள கதாபாத்திரங்கள்...

2006 ஆம் ஆண்டு உலக நாயகன் கமல் ஹாசன் நடிப்பில், இயக்குனர் கவுதம் மேனன் இயக்கத்தில் வெளியாகி தமிழ் சினிமாவில் மாபெரும் வெற்றி படமாக கொண்டாடப்பட்ட திரைப்படம், வேட்டையாடு விளையாடு. இந்த படத்தில் நடிகர் டேனியல் பாலாஜி முக்கிய வில்லனாக நடித்திருந்தார். 'அமுதன் சுகுமாரன்' கதாபாத்திரத்தில் நடித்து பலரால் கொண்டாடப்பட்ட நடிகர் டேனியல் பாலாஜி, இந்த படத்தின் மூலம் ஒரு வில்லத்தனமான நடிப்பை வெளிப்படுத்தி வில்லன் நடிகராக அறிமுகமாகி பிரபலமானார்.

2007 ஆம் ஆண்டு தனுஷ் நாயகனாக நடிக்க இயக்குனர் வெற்றிமாறன் இயக்கியிருக்கும் திரைப்படம், பொல்லாதவன். இந்த திரைப்படத்தில் நடிகர் டேனியல் பாலாஜி 'ரவி' என்ற கதாபாத்திரத்தில் நடித்திருந்தார். இப்படத்தின் வில்லன் பாத்திரத்தில் நடித்திருக்கும் இவர், பலர் மத்தியில் பிரபலமானார். இவரின் திரைப்பயண வாழ்க்கையில் பொல்லாதவன் திரைப்படம் முக்கிய திரைப்படமாக அமைந்துள்ளது.

வட சென்னை - 2018 ஆம் ஆண்டு இயக்குனர் வெற்றிமாறன் - நடிகர் தனுஷ் நடிப்பில் வெளியான வெற்றி திரைப்படமான வட சென்னை திரைப்படத்தில் நடிகர் டேனியல் பாலாஜி 'தம்பி' என்ற கதாபாத்திரத்தில் நடித்திருந்தார். இந்த படத்தில் கொண்டாடப்பட்ட ராஜன் கதாபாத்திரத்தின் தம்பி பாத்திரத்தில் நடித்துள்ள இவர், இப்படத்தின் மூலம் மிகப்பெரிய மைலேஜ் கிடைத்து ரசிகர்கள் மத்தியில் கொண்டாடப்பட்டார். வட சென்னை படத்தில் இவர் பேசியுள்ள வசனங்களான 'லைப் ஆ தொலச்சுட்டையேடா' போல பல வசனங்கள் ரசிகர்கள் மத்தியில் பிரபலமானது.

தளபதி விஜய் நடிப்பில் 2019ஆம் ஆண்டு வெளியான பிகில் மற்றும் 2017ல் வெளியான பைரவா திரைப்படத்தில் நடிகர் டேனியல் பாலாஜி வில்லன் கதாபாத்திரத்தில் நடித்துள்ளார். இந்த இரண்டு படங்களிலும் முதற்பாதியில் வில்லனாக நாயகனை எதிர்க்கும் கதாபாத்திரத்தில் நடித்து இரண்டாம் பாதியில் மனம் திருந்தும் கதாபாத்திரத்தில் நடித்துள்ளார். 

பைரவா மற்றும் பிகில் படங்களில் இவரது கதாபாத்திரம் பெரிய அளவில் பேசப்படவில்லை, இருப்பினும் விஜய் படத்தில் இவர் வில்லனாக நடித்ததால் பல தமிழ் திரைப்பட ரசிகர்கள் மத்தியில் டேனியல் பாலாஜியின் நடிப்பு மற்றும் காப்பாத்திரம் பேசப்பட்டது. இவரது கதாபாத்திரத்தை சமூக வலைத்தளத்தில் மீம்ஸ் மூலம் பிரபலம் செய்தனர், ரசிகர்கள்.

நடிகர் சூர்யா நடிப்பில் இயக்குனர் கவுதம் மேனன் இயக்கத்தில் 2003 ஆம் ஆண்டு வெளியான சூப்பர் ஹிட் அதிரடி, திரில்லர் திரைப்படம், காக்க காக்க. இப்படத்தில் நடிகர் சூர்யாவுடன் பல காட்சிகளில் நடித்து பிரபலமானார், டேனியல் பாலாஜி. நடிகர் சூர்யாவின் தோழனாகவும், போலீஸ் அதிகாரியாக நடித்துள்ள டேனியல் பாலாஜி பல இடங்களில் சூர்யாவுக்கு நிகராக இப்படத்தில் ஸ்கோர் செய்துள்ளார்.