ரஜினி பட டைட்டிலை கைப்பற்றிய இன்றய தலைமுறை ஹீரோக்கள்

1987ஆம் ஆண்டின் மிக பெரிய அளவில் புகழ் பெற்ற ரஜினி நடித்த வேலைக்காரன் பட தலைப்பை கைப்பற்றிய சிவகார்த்திகேயன், 2017ஆம் ஆண்டு மோகன் ராஜா இயக்கத்தில் சிவகார்த்திகேயன், நயன்தாரா, ஃபகத் ஃபாசில் நடித்துள்ள படத்திற்கு வேலைக்காரன் என பெயரிட்டுள்ளார். ஆனால் சிவகார்த்திகேயன் நடித்த வேலைக்காரன் படம் பெரிய அளவில் ஹிட் ஆகவில்லை என்றாலும், பெரிய அளவில் பேசப்பட்டது.

ரஜினியின் சுப்பர் ஹிட் படமான பில்லா படத்தின் டைட்டிலில் நடித்துள்ளார் நடிகர் அஜித் குமார். டைட்டில் மட்டுமல்ல கதையும் அதே தான். இந்த படம் பிளாக்பஸ்டர் வெற்றியை பெற்ற நிலையில் அதன் இரண்டாம் பாகமாக பில்லா 2 படமும் இயக்கப்பட்டது. அஜித் இரட்டை வேடங்களில் கேங்ஸ்டராக நடித்த படம். ரஜினியின் பில்லா படத்தின் தாக்கத்தை இக்காலத்திற்கு ஏற்ப புதுப்பொலிவுடன் நடிகர் அஜித் நடிப்பில் வெளியாகி பலரால் கொண்டாடப்பட்டு பிளாக்பஸ்டர் படமாக புகழ் பெற்றுள்ளது.

ரஜினியின் ஆக்ஷன் ஹீரோ டைட்டிலான நான் மகான் அல்ல படத்தின் தலைப்பை நடிகர் கார்த்தி பயன்படுத்தி நடித்துள்ளார். இந்த படம் கரா்த்தியின் சினிமா வாழ்க்கையில் இவரது இமேஜையே மாற்றியது. கார்த்தியை ஆக்ஷன் ஹீரோவாக மாற்றியது இந்த படம் தான். சாதாரண திரைக்கதையில் ரசிகர்களுக்கு தேவையான அளவில் ஆக்ஷன், விறுவிறுப்பு குடும்ப செண்டிமெண்ட் என அனைத்தையும் கவர்ந்து இப்படம் தமிழகத்தில் பெரிய அளவில் ஹிட் அடித்துள்ளது.

ரஜினியின் சூப்பர் ஹிட் படங்களில் ஒன்றாக நான் சிவப்பு மனிதன் டைட்டிலில் விஷால் நடித்தார். ஆனால் இந்த படம் பெரிய அளவில் வரவேற்பை பெறவில்லை. டைட்டிலுக்கும் கதைக்கும் சம்பந்தமே இல்லை என்று தான் பலர் தெரிவித்தனர். திரு இயக்கத்தில் விஷால் - லட்சுமி மேனன் நடித்துள்ள திரைப்படம். 

ரஜினி நடித்த மனிதன் பட டைட்டிலை உதயநிதி ஸ்டாலின் வழக்கறிஞர் கதாபாத்திரத்தில் நடித்த படத்திற்கு உபயோகப்படுத்தியுள்ளார். உதயநிதியின் திரையுலக பயணத்தில் மனிதன் படம் மிகப் பெரிய திருப்பு முனையாக அமைந்தது. உதயநிதியின் திரைவாழ்வு மற்றும் அரசியல் வாழ்க்கைக்கு பயன்படும் வகையில் வசனங்களும் திரைக்கதையும் அமைக்கப்பட்டுள்ளது.

ரஜினி நடித்து, படம் முழுவதும் பஸ்ஸிலேயே பயணம் செய்வது போல் காட்டப்படும் படம் கழுகு. இந்த பட டைட்டிலில் நடிகர் கிருஷ்ணா நடித்திருந்தார். இந்த படமும் அதிகம் எதிர்பார்க்கப்பட்டு, கடைசியில் தோல்வி படமாக அமைந்தது.

டாப் ஆக்ஷன் ஹீரோக்கள் மட்டுமல்ல டைரக்டராக இருந்து நடிகரான சுந்தர்.சி.,யும் ரஜினி பட டைட்டிலில் இரண்டு படங்களில் நடித்துள்ளார். குரு சிஷ்யன் படத்தை தொடர்ந்து தீ பட டைட்டிலிலும் சுந்தர்.சி நடித்தார். ஆனால் இரண்டு படங்களுமே சொல்லிக் கொள்ளும் அளவிற்கு வெற்றி பெறவில்லை.

ரஜினி நடித்த முழு நீள பிளாக்பஸ்டர் காமெடி படமான தில்லு முல்லு பட டைட்டிலில் மிர்ச்சி சிவா ரீமேக் படமாக நடித்துள்ளார். திரைக்கதையில் ரஜினியின் தில்லு முல்லு படத்தின் கதையை இக்காலத்திற்கு ஏற்ப சில மாற்றங்கள் செய்து அதே கதைக்களத்தில் எடுத்துள்ளனர். ஆனால் ரசிகர்களின் மனங்களை கவர இந்த படம் தவறி விட்டது. 

ரஜினி, சிவாஜி உள்ளிட்டோர் நடித்து வெளிவந்த படம் விடுதலை. ரஜினி - சிவாஜி காம்போவில் உருவான இந்த படம் செம ஹிட் படமாக அமைந்தது. தற்போது இதே டைட்டிலில் வெற்றிமாறன் இயக்கத்தில் சூரி, விஜய் சேதுபதி நடிக்கும் புதிய படத்திற்கும் விடுதலை என டைட்டில் வைக்கப்பட்டுள்ளது. அதிகம் எதிர்பார்க்கப்படும் இந்த படம் இரண்டு பாகங்களாக இயக்கப்பட உள்ளதாக சொல்லப்படுகிறது.

1980ம் ஆண்டு ரஜினி நடித்த பொல்லாதவன் படத்தின் தலைப்பை 2007ஆம் ஆண்டு தனுஷ் - வெற்றிமாறன் கூட்டணியில் உருவான முதல் படத்திற்கு பொல்லாதவன் என தலைப்பு பொருத்தப்பட்டது. ரஜினியின் பொல்லாதவன் திரைப்படம் போல் தனுஷ் நடித்த திரைப்படமும் பெரிய அளவில் பேசப்பட்டு தனுஷிற்கு புகழினை அள்ளித்தந்துள்ளது. இப்படத்தில் நடிகர் தனுஷிற்கு 'இந்தியன் ப்ருஸ் லீ' என்ற புனைபெயரும் கிடைத்தது.

ரஜினியின் பொல்லாதவன் படத்தின் தலைப்பை 2007ஆம் ஆண்டு தனுஷ் பயன்படுத்தியுள்ளார், இப்படத்தின் பிரமாண்ட வெற்றிக்கு பின் 2010 ஆம் ஆண்டு இயக்குனர் சுராஜ் இயக்கத்தில் மாப்பிள்ளை படத்தில் நடித்துள்ளார், தனுஷ். இப்படம் ரஜினி நடிப்பில் சூப்பர் ஹிட் படமான மாப்பிள்ளை படத்தின் ரீமேக் படமாகும். ரஜினியின் மாப்பிள்ளை படத்தின் திரைக்கதையில் இக்காலத்திற்கு ஏற்ப சில மாற்றங்கள் செய்து இப்படத்தினை இயக்கியுள்ளனர், ஆனால் தனுஷின் மாப்பிளை திரைப்படம் பெரிய அளவில் பேசப்படவில்லை.

ரஜினியின் வேலைக்காரன் பட தலைப்பை பயன்படுத்திய சிவகார்த்திகேயன், தற்போது இவர் நடிக்கும் புதிய படத்திற்கு மாவீரன் என மீண்டும் ரஜினி பட தலைப்பை பயன்படுத்தியுள்ளார். இப்படம் ஒரு சூப்பர் ஹீரோ திரைப்படம் போல அறிவிப்புகள் வெளியாகியுள்ளது. இப்படத்தின் இயக்குனர் மடோனே அஸ்வின் மண்டேலா படத்தினை இயக்கி சினிமாவில் அறிமுகமாகியுள்ளார்.

ரஜினியின் நடிப்பில் வெளியான தங்க மகன் படத்தின் தலைப்பை நடிகர் தனுஷ் - சமந்தா - எமி ஜாக்சன் நடித்துள்ள படத்திற்கு பயன்படுத்தியுள்ளார். இப்படத்தின் மூலம் நடிகர் தனுஷ் மூன்றாவது முறையாக ரஜினி பட தலைப்பை உபயோகப்படுத்தியுள்ளார். தனுஷ் நடித்துள்ள தங்கமகன் திரைப்படம் பெரிய அளவில் பேசப்படவில்லை.