எழுமின்

ஆபாசம், கவர்ச்சி, இரட்டை அர்த்த காமெடி வசனங்கள் என வழக்கமான கமர்சியல் சினிமாவாக இல்லாமல், குழந்தைகளுக்கான திரைப்படம் ஒன்றை எடுத்ததற்காகவே இயக்குனர் விஜிக்கு மிகப்பெரிய பாராட்டுகள். குழந்தைகளுக்கான கேளிக்கையாக மட்டும் இல்லாமல், நல்ல செய்தி ஒன்றை சொல்கிறது எழுமின். வழக்கமான ஸ்போர்ட்ஸ் பட பார்முலாவுக்குள் படத்தை நகர்த்தாமல், மாணவர்கள் கற்கும் தற்காப்பு கலை நிஜ வாழ்க்கையில் அவர்களுக்கு எப்படி உதவுகிறது என்பதை காட்சிப்படுத்தி இருப்பது சிறப்பு. நிறைய விஷயங்களை ரிஸ்க் எடுத்து செய்திருக்கிறார்கள். காமெடி ஹீரோவான விவேக்குக்கு இது புதிய பரிமாணம். மகன் மீது அளவுக்கு அதிகமான பாசம் வைத்திருக்கும் அவர், அவனை இழக்கும் போது வெளிப்படுத்தும் உணர்வுகள் நம் கண்ணில் கண்ணீர் வரவழைக்கின்றன. நிஜ வாழ்க்கையில் அவர் எப்படி தவிக்கிறார் என்பதை திரையிலும் வெளிப்படுத்தியிருக்கிறார். பல இடங்களில் மங்களம் சாரை ஞாபகப்படுத்தினால், இந்த படத்துக்கு அது நிச்சயம் தேவை என மனம் ஏற்றுக்கொள்கிறது. காமெடி ஏரியாவை செல் முருகனுக்கு விட்டுக்கொடுத்துவிட்டு, பெர்பாமன்ஸ் காட்டுவதில் மட்டும் கவனம் செலுத்தியிருக்கிறார். நீண்ட இடைவெளிக்கு பிறகு வெள்ளித் திரையில் மீண்டும் நடிகை தேவயானி. அதே கொஞ்சும் அழகுடன் மிளிர்கிறார். ஒரு பர்பெக்ட் அம்மாவாக சிறப்பாக செய்திருக்கிறார். வெல்கம் பேக் தேவயானி. வில்லன்களாக நடித்திருக்கும் அழகம்பெருமாள், ரிஷி, போலீசாக நடித்திருக்கும் பிரேம்குமார் என அனைவருமே சிறப்பாக செய்திருக்கிறார்கள். செல் முருகனின் ஒன் லைன்கள் சிரிப்பை வரவைக்கின்றன. இருப்பினும் இன்றைய காலத்துக்கு குழந்தைகளுக்கு மிகவும் அவசியமான படம் எழுமின். அடிக்கு அடி, உதைக்கு உதைன்னு சட்டத்தை கையில் எடுக்கிறது தப்புதான். ஆனால் இன்றைக்கு குழந்தைகளுக்கு எதிராக நடக்கும் வன்முறைகளை பார்க்கும் போது, அதெல்லாம் தப்பே இல்லைன்னு நினைக்க தோணுது. குழந்தைகளுக்கு படிப்பு ஒன்று மட்டுமே போதாது, தற்காப்பு கலையும் அவசியம் எனச் சொல்லும் எழுமின் படத்தை பாராட்டி வரவேற்கலாம்.